میرپورخاص،17 جولائی(اے پی پی):آئی جی سندھ غلام نبی میمن نے ڈی آئی جی میرپورخاص ذوالفقار علی مہر کو ہدایت کی ہے کہ مرتب کیئے جانیوالے محرم پلان میں یکم تا عاشورہ محرم کے سیکیورٹی اقدامات سمیت چہلم حضرت امام حسینؓ کے موقع پر بھی تمام جلوسوں،مرکزی جلوس،مجالس ودیگر اجتماعات کی سیکیورٹی کو انتہائی ٹھوس اور فول پروف بنایا جائے اور اس حوالے سے رینجرز وقانون نافذ کرنیوالے دیگر اداروں/انٹیلی جینس ایجینسیوں سے مربوط روابط پر خصوصی تو جہ دی جائے جبکہ محرم پلان کی ترتیب میں اہل تشیع اور اہلسنت علماء/ذاکرین کی جانب سے پیش کردہ تجاویز اور مشاورت کو بھی شامل کیا جائے۔
یہ ہدایات انہوں نے میرپورخاص رینج میں محرم الحرام کے حوالے سے ویڈیو لنک اجلاس کی صدارت کرتے ہوئے دیں ۔ اجلاس میں یکم تاعاشورہ محرم اور بعداذاں سوئم حضرت امام حسینؓ کے موقع پر ترتیب دیئے جانیوالے کنٹی جینسی پلان پر تفصیلی تبادلہ خیال کیا اور اپنی جانب سے مزید ضروری تجاویز اور سفارشات پیش کیں۔
آئی جی سندھ غلام نبی میمن نے اجلاس کے شرکاء کو مخاطب کرتے ہوئے کہا کہ ہمیں لوگوں کے ساتھ احسن سلوک اور برتاؤ جیسے عمل کو ہر سطح پر فروغ دینا ہوگا اورانفرادی و اجتماعی سطح پر صبروتحمل اورقوت برداشت کو مذید تقویت دینا ہوگی جوکہ بلاشبہ حقیقی امن وخوشحالی کے متقاضی ہیں۔
وفد کے اراکین نے رواں سال یکم تا دس محرم پولیس کی جانب سے فول پروف کنٹی جینسی پلان کی ترتیب اور اسکے تحت اختیارکردہ مجموعی سیکیورٹی اقدامات پر اپنے مکمل اطمینان کا اظہار کیا اور اپنی جانب سے پولیس کو مکمل تعاون کی یقین دہانی کرائی۔
اس موقع پر اجلاس میں شریک وفد نے یہ بھی یقین دلایا کہ وہ باہمی محبت اخوت اوربھائی چارگی کی فضاء کو نا صرف پروان چڑھائیں گے بلکہ باہمی روابط کو مذید تقویت دیتے ہوئے ضلعوں کی سطح پر بین المسالک/مکاتب ہم آہنگی کے فروغ جیسے اقدامات کو اسکی روح کے مطابق انفرادی اوراجتماعی کاوشوں سے بھی یقینی بنائیں گے۔
اجلاس میں ایس ایس پی میرپورخاص کیپٹن (ر) اسد علی چوہدری اور میرپورخاص ڈویژن سے تعلق رکھنے والے اہل تشیع علماء، ذاکرین اور منتظمینِ جلوس و مجالس پر مشتمل سات رکنی وفد جن میں سید حمزہ نقوی منتظم اعلیٰ درگاہ مکھن شاہ و ممبر پیس کمیٹی میرپورخاص ، ڈاکٹر ثاقب کاظمی صوبائی نائب صدر سندھ تحریک نفاذ فقہ جعفریہ و میمبر پیس کمیٹی میرپورخاص ، سید ذوالفقار علی شاہ متولی بخاری امام بارگاہ سامارو و میمبر ڈسٹرکٹ پیس کمیٹی عمرکوٹ ، عباس علی شاہ متولی مرکزی امارم بارگاہ پنج پیر عمرکوٹ ، غضنفر علی متولی کہری امام بارگاہ عمرکوٹ، فقیر صابر علی صوبائی نائب صدر شیعہ علماء کونسل و انچارج عزاداری سیل مٹھی ، ذیشان حیدر عزاخانہ زہراّ مٹھی نے شرکت کی۔
اجلاس کے اختتام پر وفد کے شرکاء نے ملک وقوم کی ترقی خوشحالی اور سالمیت کی مشترکہ طور پر دعا کی۔
