میرپورخاص، 20 جولائی (اے پی پی):ایڈیشنل ڈپٹی کمشنر ون میرپورخاص آصف رضا چانڈیو کی صدارت میں دربار ہال میرپورخاص میں ڈسٹرکٹ ڈیزاسٹر مینجمنٹ کمیٹی کا اجلاس منعقدہوا۔ایڈیشنل ڈپٹی کمشنر ون نے ہدایت کی کہ مون سون بارشوں کے پیش نظر ہنگامی صورتحال سے نمٹنے کے لئے تمام محکموں کے سربراہان ہنگامی صورتحال سے نمٹنے کیلئے پلان بنائیں اور جلد رپورٹ پیش کی جائے ۔ مون سون کی تیز بارشوں میں نالوں کی صفائی ستھرائی ، بارش کے پانی کی نکاسی ، پینے کے پانی کی فراہمی اور دیگر مسائل ہنگامی بنیادوں پر حل کئے جائیں ، مون سون بارشوں کے دوران تمام افسران اپنے اپنے علاقوں میں مسائل کے فوری حل کے ساتھ ساتھ الرٹ رہیں اس ضمن میں کسی بھی قسم کی کوتاہی ہرگز برداشت نہیں کی جائے گی ۔
ایڈیشنل ڈپٹی کمشنر نے کہا کہ گزشتہ بارشوں میں مسائل کے حل کے لئے کئے گئے اقدامات کو سامنے رکھتے ہوئے بہتر و موثر حکمت عملی اپنائی جائے اس ضمن میں اپنی اپنی تحصیلوں میں کنٹرول روم قائم کیے جائیں ، ہر محکمہ اور سماجی تنظیمیں اپنا فوکل پرسن مقرر کرکے ان کے رابطہ نمبر ضلع انتظامیہ کو فراہم کریں تاکہ ہنگامی صورتحال میں رابطہ ہو سکے۔ انہوں نے مزید کہا کہ تمام سماجی تنظیمیں متعلقہ تحصیلوں کے اسٹنٹ کمشنرز سے رابطے میں رہیں اورتحصیل سطح پرمتعلقہ سٹیزن فورم اورمتعلقہ فوڈ ریلیف کمیٹیاں تشکیل دی جائیں ۔
انہوں نے محکمہ لائیو اسٹاک کے افسران کو ہدایت کی کہ وہ مویشیوں کو بیماریوں سے محفوظ بنانے کے لیے مختلف تحصیلوں میں وٹنری کیمپس لگائیں اور ویکسی نیشن کے کام کو مزید تیز کیا جائے ۔
اجلاس میں ایڈیشنل ڈپٹی کمشنر ٹو پریم چند ، تمام تحصیلوں کے اسٹنٹ کمشنرز، ڈپٹی ڈائریکٹر سوشل ویلفیئر جنید مرزا ، ڈپٹی ڈائریکٹر انفارمیشن غلام رضا کھوسو، محکمہ زراعت ، لائیو اسٹاک ، پبلک ہیلتھ ، محکمہ آبپاشی ، سماجی تنظیموں کے نمائندوں اور دیگر افسران نے شرکت کی۔
