لاہور،15 جولائی (اے پی پی):نگران وزیراعلی پنجاب محسن نقوی نے ڈسٹرکٹ ہیڈ کوارٹر ہسپتال ننکانہ صاحب کا دورہ کیا، ہسپتال میں علاج معالجے کی سہولتوں کا جائزہ لیا اورمریضوں کی عیادت کی ،انہوں نے مریضوں سے ہسپتال میں فراہم کردہ طبی سہولتوں کے بارے میں پوچھا،انہوں نے ایمرجنسی، بچہ وارڈ،ریڈیالوجی ڈیپارٹمنٹ، آئی سی یو، لیبارٹری اور دیگر وارڈز کا معائنہ کیا۔
وزیر اعلی محسن نقوی کو ایک خاتون اپنے بچے کے مرض کے بارے میں بتاتے ہوئے آبدیدہ ہو گئی تو انہوں نے خاتون کو دلاسہ دیا اور بچے کو آج ہی لاہور شفٹ کرنے کی ہدایت کی،محسن نقوی نے کہا کہاماں جی آپ فکر نہ کریں، بچے کا علاج اپنی نگرانی میں کرائوں گا، انشا اللہ آپ کا بچہ جلد صحت یاب ہو گا،انہوں نے ہسپتال کے واٹر فلٹریشن پلانٹ کا بھی معائنہ کیا اور پلانٹ میں گندگی پر برہمی کا اظہار کیا،واٹر فلٹریشن پلانٹ میں صفائی ستھرائی یقینی بنانے کا حکم دیا۔
وزیر اعلی محسن نقوی نے ہسپتال میں صفائی کے انتظامات کا بھی مشاہدہ کیا اور صفائی کے انتظامات کو بہتر بنانے کی ہدایت کی۔انہوں نے ہسپتال کی پرانی وہیل چیئر ز کو تبدیل کرنے کا حکم دیا اور ہدایت کی کہ فوری طور پر نئی وہیل چیئرز کا انتظام کیا جائے۔انہوں نے ہسپتال انتظامیہ کو ہدایت کی کہ مریضوں کو بہترین طبی سہولتیں فراہم کی جائیں۔
