لاہور، 23 جولائی(اے پی پی): بحریہ آرچرڈ ہسپتال میں 8 سالہ ننھی نور فاطمہ کو دل کا کامیاب آپریشن کرنے کے بعد مکمل صحت یاب ہونے پر ہسپتال سے ڈسچارج کر دیا گیا ہے۔ نگراں وزیراعلیٰ پنجاب محسن نقوی نے ہسپتال کا دورہ کیا۔ چیف سیکرٹری، انسپکٹر جنرل آف پولیس اور سیکرٹری صحت ان کے ہمراہ تھے۔
وزیراعلیٰ محسن نقوی، چیف سیکرٹری، آئی جی پولیس نے بچی سے ملاقات کی اور اسے گھر روانہ کیا۔ وزیراعلیٰ محسن نقوی اور چیف سیکرٹری زاہد اختر زمان نے ننھی نور فاطمہ کو تحفہ دیا۔ انسپکٹر جنرل آف پولیس ڈاکٹر عثمان انور ننھی بچی کا دل بہلاتے رہے۔
وزیراعلیٰ محسن نقوی نے ننھی نور فاطمہ کی مکمل صحت یابی اور ہسپتال سے ڈسچارج ہونے پر خوشی کا اظہار کیا۔ انہوں نے دل کے کامیاب آپریشن کے بعد مکمل صحت یاب ہونے پر ننھی نور فاطمہ سے پیار کا اظہار کیا۔
بچی کی والدہ نے بہترین علاج اور دیکھ بھال فراہم کرنے پر وزیراعلیٰ محسن نقوی اور ہسپتال انتظامیہ کا شکریہ ادا کیا۔
واضح رہے کہ ننھی نور فاطمہ کے دل کے دو شریانیں بلاک ہوگئے تھے اور وزیراعلیٰ محسن نقوی نے ڈی ایچ کیو اسپتال قصور کے دورے کے دوران ننھی نور فاطمہ کو بحریہ آرچرڈ اسپتال منتقل کرنے کی ہدایت کی تھی۔ ننھی نور فاطمہ کا بحریہ آرچرڈ ہسپتال میں مفت آپریشن کیا گیا۔
وزیراعلیٰ محسن نقوی نے کہا کہ اللہ تعالیٰ کے فضل و کرم اور بحریہ ہسپتال کے ڈاکٹروں کی محنت سے ننھی نور فاطمہ کو نئی زندگی نصیب ہوئی ہے۔ انہوں نے بحریہ آرچرڈ اسپتال کی انتظامیہ اور ڈاکٹرز کا شکریہ ادا کیا۔
