لاہور، 19جولائی(اے پی پ): پنجاب کابینہ کی لاء اینڈ آرڈر کمیٹی کے اراکین نے رات گے اندرون شہر لاہور میں محرم الحرام کے سیکیورٹی انتظامات کا جائزہ لیا ۔ وزرا نے محرم الحرام کے مرکزی جلوس کے راستے کا پانچ کلومیٹر تک خود پیدل چل کر جائزہ لیا۔ قائمہ کمیٹی برائے لاء اینڈ آرڈر کے اراکین کو محرم الحرام کے حوالے سے کئے گئے انتظامات پر بریفننگ دی گئی۔ سیکیورٹی انتظامات کا جائزہ لینے والے صوبائی وزراء میں عامر میر، منصور قادر، اظفر علی ناصر، ڈاکٹر جاوید اکرم ایس ایم تنویر اور ابراہیم مراد شامل تھے۔ صوبائی وزراء نے بھاٹی گیٹ سے کربلا گامے شاہ تک جلوس کے روٹس کا پیدل دورہ کر کے حفاظتی انتظامات کا جائزہ لیا۔ صوبائی وزیر اطلاعات عامر میر نے کہا کہ پنجاب حکومت محرم الحرام کی مجالس اور جلوسوں کو فول پروف سیکورٹی فراہم کرے گی۔ محرم الحرام کے روٹس کی سیکیورٹی کیمروں سے 24 گھنٹے نگرانی کی جائے گی۔ عامر میر نے کہا کہ محرم الحرام کی تقریبات کو مانیٹر کرنے کے لیے سینٹرل کنٹرول روم قائم کیا جارہا ہے۔ محرم کے جلوسوں اور مجالس کی جگہوں پر روشنی کا بہترین انتظام کیا جائے گا۔ عامر میر نے کہا کہ لیسکو حکام کو بھی مرکزی جلوس کے روٹ پر لٹکی ہوئی تاریں ہٹانے کے احکامات دے دیے گئے ہیں۔
