ایبٹ آباد، 06 جولائی (اے پی پی):گلیات ڈویلپمنٹ اتھارٹی نے فیلڈ، ٹیکنیکل اور میونسپل سروسز کے عملے کے اعزاز میں تقسیم اسناد کی تقریب اور ظہرانے کا انعقاد کیا۔ ظہرانے کی میزبانی ڈائریکٹر جنرل جی ڈی اے واصف سعید، اے سی گلیات اور ڈی ایس پی گلیات نے کی۔ تقریب کا بنیادی مقصد خاص طور پر عید الاضحی کے چار دنوں کے دوران سٹاف کو ان کے فرائض کی انتھک اور غیر متزلزل کاوشوں کے لئے اعزاز دینا تھا۔ جس میں مجموعی طور پر 170 کے قریب مختلف سٹاف کو تعریفی سرٹیفیکٹ سے نوازا گیا۔ سینڑی ورکر کے علاوہ کنڑول روم میں فرائض ادا کرنے والے سٹاف،ڈرائیورز اور ہیوی مشینری آپریٹرز اور جی ڈی اے گائیڈز کو عید کے چار دنوں کے دوران مسلسل کام کرنے والے سٹاف کو سیاحوں کی مدد و رہنمائی کرنے پر شاندار الفاظ سے داد دی گئی۔ اس موقع پر ڈائریکڑ جنرل جی ڈی اے نے سٹاف کے مسائل سنے اور انہیں ترجیحی بنیادوں پر حل کرنے کا عزم کیا۔ ڈی جی نے جی ڈی اے کی جانب سے ضلعی انتظامیہ اور پولیس حکام کا شکریہ ادا کیا کہ انہوں نے اپنے فرائض کی ادائیگی میں مربوط کوششیں کیں۔
