اوکاڑہ،31اگست(اے پی پی ):ڈپٹی کمشنر ڈاکٹر محمد ذیشان حنیف نے کہا ہے کہ تمام سرکاری ادارے اور سول سوسائٹیاں انسداد ڈینگی کا حصہ بنیں، اپنے دفاتر اور گھروں کی صفائی ستھرائی پر توجہ دینے میں لاپرواہی بہت بڑے خطرے کا پیش خیمہ ثابت ہو سکتی ہے۔
ان خیالات کا اظہار انہوں نے انسداد ڈینگی کمیٹی کے جائزہ اجلاس کی صدارت کرتے ہوئے کیا۔انہوں نے کہاکہ میں خودبھی تمام اداروں کا دورہ کروں گاتاکہ وہاں سرویلینس اور صفائی ستھرائی کا پتہ لگ سکے۔
اجلاس میں ڈسٹرکٹ اینٹامالوجسٹ حافظ محمدعبداللہ، سی ڈی سی آفیسر چوہدری اصغرعلی نے ڈپٹی کمشنر محمد ذیشان حنیف کو بریفنگ دیتے ہوئے کہا کہ ضلع میں ویکٹر سرویلینس کاکام کرنے والی ٹیموں کی سرگرمیوں اور ہاٹ سپاٹس کی نگرانی کے لئے محکمہ صحت کی ٹیمیں چوبیس گھنٹے متحرک ہیں۔
اجلاس میں سی ای او ہیلتھ ڈاکٹر سیف اللہ وڑائچ، ایم ایس ڈی ایچ کیو ہسپتال ساوتھ سٹی ڈاکٹر نوید حفیظ،ایم ایس ڈی ایچ کیو سٹی ہسپتال ڈاکٹر سجاد حسین گیلانی،ڈاکٹر عادل رشید سمیت دیگر متعلقہ محکموں کے سربراہان نے بھی شرکت کی۔
