لاہور،17اگست (اے پی پی):نگران صوبائی وزیرٹرانسپورٹ ابراہیم مراد نے کہا ہے کہ ماحول دوست الیکٹرک بسیں جلد سڑکوں پر نظرآئیں گی، حکومت پنجاب لاہور میں الیکٹرک بسوں کا پائلٹ پراجیکٹ جلد شروع کرنے پر کام کر رہی ہے۔ انہوں نے بتایا کہ 3400ملین روپے کی لاگت سے الیکٹرک بسوں کا منصوبہ مختلف اضلاع میں مکمل کیا جائے گا۔
ان خیالات کا اظہار انہوں نے پنجاب میں ماحول دوست الیکٹرک بسیں چلانے کے منصوبے کے حوالے سے اجلاس کی صدارت کرتے ہوئے کیا۔ صوبائی وزیر ابراہیم مراد نے کہا کہ ابتدائی طور پر 34 الیکٹرک بسیں صوبائی دارالحکومت لاہور میں چلائی جائیں گی اور منصوبے کو صوبائی سطح پر لے جایا جائے گا۔ ابراہیم مرادنے کہا کہ ماحولیاتی آلودگی سے بچائو کیلئے ماحول دوست منصوبوں پر کام کرنے کی ضرورت ہے۔انہوں نے کہا کہ ماحولیاتی تبدیلیوں کو مدِنظر رکھتے ہوئے ماحول دوست اقدامات کو فروغ دینا ہو گا کیونکہ ماحولیاتی تبدیلیاں و آلودگی دورِ حاضر کے سب سے بڑے چیلنج ہیں۔
اس موقع پر سیکریٹری ٹرانسپورٹ ڈاکٹر احمد جاوید قاضی نے بھی خطاب کیا۔ اجلاس میں سی ای او پنجاب ٹرانسپورٹ کمپنی فائق احمد، سیکریٹری پنجاب ٹرانسپورٹ اتھارٹی فیصل مانگٹ و دیگر شریک تھے۔
