نواب شاہ،04اگست(اے پی پی): سندھ حکومت کے سندھ پیپلز ہاؤسنگ فار فلڈ افکٹیز کے تحت برسات و سیلاب متاثرین میں گھروں کے مالکانہ حقوق کے سرٹیفکیٹ تقسیم کی تقریب منعقد کی گئی۔ تقریب میں صوبائی وزیر صحت ڈاکٹر عذرا فضل پیچوہو نے مہمان خصوصی کے طور پر شرکت کی۔ تقریب میں ضلع شہید بینظیرآباد کی 5 سو خواتین میں اپنی زمین اپنا مکان کے تحت سرٹیفکیٹ تقسیم کئے گئے۔
مقامی ہال میں منعقدہ تقریب میں بارش و سیلاب متاثرین خواتین بڑی تعداد میں موجود تھیں ۔ سندھ پیپلز ہاؤسنگ فار فلڈ افکٹیز کے تحت ضلع کے ایک لاکھ 13 ہزار 590 بارش و سیلاب متاثرین کو اپنے گھروں کے مالکانہ حقوق دئیے جائیں گے جس میں تحصیل نواب شاہ کے 17 ہزار 295، دوڑ کے 39 ہزار 374، قاضی احمد کے 33 ہزار 123 اور تحصیل سکرنڈ کے 23 ہزار 798 شامل ہیں جن کو ضلع انتظامیہ اور سماجی تنظیم سافکو کی ویریفکیشن کے بعد مالکانہ حقوق دئیے جارہے ہیں۔ تقریب میں رکن قومی اسمبلی غلام مصطفیٰ شاہ، رکن سندھ اسمبلی غلام قادر چانڈیو، رکن سندھ اسمبلی خان محمد ڈاہری، وائس چانسلر بینظیر بھٹو یونیورسٹی پروفیسر ڈاکٹر امانت علی جلبانی، کمشنر شہید بینظیرآباد ڈویژن محمد عباس بلوچ، ڈی آئی جی محمد یونس چانڈیو، ڈپٹی کمشنر شہید بینظیرآباد شہریار گل میمن،ایس ایس پی مہزور علی، چیئرمین ضلع کونسل علی اکبر جمالی، مئیر قاضی محمد رشید بھٹی سمیت مختلف محکموں کے افسران کے علاؤہ چاروں تحصیلوں کی مالکانہ حقوق کی سندیں وصول کرنے والی خواتین و معزز شہریوں نے بڑی تعداد میں شرکت کی۔
