ملتان ،22اگست(اے پی پی )کمشنر ملتان ڈویژن انجینئر عامر خٹک کی زیر صدارت اضلاع کی کارکردگی بارے جائزہ اجلاس منعقد ہوا۔کمشنر عامر خٹک نے کہا کہ سیلابی صورتحال کے پیش نظر ڈویژن میں خیمہ بستیاں قائم کی گئیں ہیں۔ڈویژن میں قائم ٹینٹ ویلج میں مکمل سہولیات فراہم کی گئی ہیں۔سیلاب سے متاثرہ علاقوں سے شہریوں، مویشیوں کا انخلااولین ترجیح ہے۔ انہوں نے انسداد ڈینگی مہم میں تیزی لانے کا حکم دیتے ہوئے کہا کہ ڈینگی مچھر کے خاتمے کیلئے شہریوں کو آگاہی دی جائے۔ انسداد ڈینگی ایس او پیز کی خلاف ورزی پر سخت کارروائی کی جائے۔کمشنر عامر خٹک نے پرائس کنٹرول مجسٹریٹس کو کارکردگی بہتر بنانے کا حکم دیتے ہوئے کہا کہ پرائس کنٹرول مجسٹریٹس مارکیٹوں میں اپنی موجودگی یقینی بنائیں۔نامساعد حالات میں عوام کی جیبیں لوٹنے والت کسی رعایت کے مستحق نہیں۔اجلاس میں ایڈیشنل کمشنر سرفراز احمد، اسسٹنٹ کمشنرز، ویڈیو لنک پر ڈپٹی کمشنرز ،متعلقہ محکموں کے افسران بھی اجلاس میں موجود تھے۔
