ملتان، 13 اگست(اے پی پی ):مرکزی میلاد کمیٹی کے زیراہتمام جشن آزادی کے سلسلہ میں منعقد ہونیوالاپاکستان کامنفردساتواں سالانہ آزادی مارچ میلاد چوک شاہ رکن عالم کالونی سے شروع ہوکر گلشن مارکیٹ،نون چوک سے ہوتا ہوا گلستان چوک پر اختتام پذیرہوا۔آزادی مارچ کی قیادت صوبائی صدر جمعیت علمائے پاکستان نورانی محمد ایوب مغل نورانی، مرکزی میلاد کمیٹی کے صدر رکن الدین حامدی، حاجی جاوید اختر انصاری، متحدہ میلاد کونسل کے صدرمرزاارشدالقادری،چیئرمین پروفیسر پیر شفیق اللہ البدری،پاکستان عوامی تحریک کے رہنما راؤ محمد عارف رضوی ودیگر قائدین نے کی ۔
آزادی مارچ میں حب الوطنی کے جذبے سے سرشار معروف سیاسی و سماجی شخصیات اور ہر طبقہ ہائے فکر سے متعلقہ لوگوں نے کثیر تعداد میں شرکت کی۔آزادی مارچ میں قائدین کے علاوہ معصوم بچوں اور دیگر سینکڑوں شرکاء نے جناح کیپ پہن کر شرکت کی اور بانی پاکستان قائد اعظم محمد علی جناح کی نشانی “جناح کیپ”کو پہننے کی روایت کو زندہ کرنے کا عزم کیا اور بانی پاکستان کو خراج تحسین پیش کیا۔
آزادی مارچ میں خصوصی ٹرک پر ملی ترانے عوام کا جوش گرماتے رہے جبکہ شرکاء مارچ کا جذبہ دیدنی تھا۔آزادی مارچ میں تمام روٹ کو مختلف بینرز اور پاکستانی پرچموں سے سجایا گیا تھا،تاجروں کی جانب سے آزادی مارچ کے روٹ پر ٹھنڈے پانی اور دودھ کی سبیلیں لگائی گئیں جبکہ چیئرمین یونین کونسل راؤ مظہر الاسلام کی جانب سے ٹھنڈے پانی کی موبائل سبیل پورے راستے آزادی مارچ کے شرکاء کے ساتھ رہی جبکہ ملتان کی معروف سماجی شخصیت ملک محمد یوسف،ملک عمران یوسف نے تحریک صوبہ ملتان کی جانب سے میٹھے شربت کی سبیل بھی لگائی گئی۔
تاجروں کی جانب سے آزادی مارچ کے شرکاء پر پورے راستے گل پاشی کی گئی،اور مختلف جگہوں پر بھرپوراستقبال کیا گیا۔آزادی مارچ سے خطاب کرتے ہوئے جمعیت علمائے پاکستان نورانی کے صوبائی صدر محمد ایوب مغل نورانی اورمرکزی میلاد کمیٹی کے صدر رکن الدین حامدی نے کہا کہ اللہ تعالیٰ نے پاکستان کی صورت میں ہمیں ایک عظیم نعمت سے نوازا ہے۔آج پاکستان کی نظریاتی و جغرافیائی سرحدوں پر حملے کئے جارہے ہیں مگر ہم بتانا چاہتے ہیں کہ دفاعِ وطن ایمان کا تقاضہ ہے اورپاکستان کی نظریاتی سرحدوں کی حفاظت میلادیوں کی قومی ذمہ داری ہے،ہم یہ ذمہ داری پوری طرح نبھائیں گے۔
متحدہ میلاد کونسل کے صدرمرزاارشدالقادری،چیئرمین خواجہ شفیق اللہ البدری، اورپاکستان عوامی تحریک کے مرکزی رہنما راؤ محمد عارف رضوی نے خطاب کرتے ہوئے کہا کہ پاکستان کی بنیادوں میں میلاد منانے والوں کا لہو شامل ہے،مادرِ وطن سے محبت کا جذبہ اگلی نسلوں کو منتقل کرنا ہم پر فرض ہے۔
سابق ممبر صوبائی اسمبلی حاجی جاوید اختر انصاری انجمن تاجران گلشن مارکیٹ کے صدر راؤ لیاقت علی نے اپنے خطاب میں کہا کہ پاکستان لاکھوں جانوں کی قربانیوں کے بعد حاصل ہوا ہے۔قیام پاکستان کیلئے قربانیاں دینے والے ہی اصلی قومی ہیروہیں۔آج جشن آزادی کے موقع پر پور ی قوم اپنے قومی ہیروز کو خراج تحسین پیش کرتی ہے۔ ہم پاکستان کی نظریاتی سرحدوں کے خلاف ہونیوالی ہر سازش کا ڈٹ کر مقابلہ کریں گے اور نظریاتی سرحدوں پر کوئی آنچ نہیں آنے دیں گے۔آزادی مارچ میں مختلف تنظیمات نے جلوسوں کے ہمراہ شرکت کی۔آزادی مارچ کے اختتام پر استحکام پاکستان اورشہدائے آزادی کے درجات کی بلندی کیلئے خصوصی دعا کی گئی۔
