ملتان 18 اگست (اے پی پی ) : ڈپٹی کمشنر عمر جہانگیر کی جانب سے شہر اولیاءکی خواتین و طالبات کیلئے الگ ٹرانسپورٹ ، پنک بس سروس کا آغاز کردیا گیا ہے ۔
وفاقی خاتون محتسب فوزیہ وقار اور ڈپٹی کمشنر عمر جہانگیر نے وومن یونیورسٹی میں پروقار تقریب کے دوران پنک بس سروس کا افتتاح کیا۔افتتاحی تقریب سے خطاب کرتے ہوئے وفاقی خاتون محتسب فوزیہ وقار نے کہا کہ خواتین و طالبات کو درسگاہوں اور دفاتر میں خودمختاری دینا ریاست کی ذمہ داری ہے،پنک سروس کے افتتاح سے طالبات اور خواتین کو خودمختاری کا احساس ہوگا،ضلعی انتظامیہ کے اس اقدام سے خواتین کو کے عزم و حوصلہ میں اضافہ ہوگا۔
ڈپٹی کمشنر عمر جہانگیر نے کہا کہ 21 اگست سے تعلیمی ادارے کھلنے پر پنک بس سروس دو روٹس پر چلے گی،ابتدائی طور پر ویڈا اور میٹرو بس سروس سے بسیں حاصل کی گئیں ہیں۔ انہوں نے کہا کہ چوک کمہارنوالہ سے زکریا یونیورسٹی صبح ساڑھے 7 بجے اور بہاﺅ الدین زکریا یونیورسٹی سے چوک کہمارنوالہ دوپہر سوا ایک بجے بس چلے گی جبکہ چونگی نمبر 9 سے نادر آباد پھاٹک صبح 7 بج کر 40 منٹ اور نادر آباد پھاٹک سے چونگی نمبر 9 شام 5 بج کر 10 منٹ پر بس چلے گی۔
ڈپٹی کمشنر کا کہنا تھا کہ خواتین کی خودمختاری کسی بھی قوم کی سماجی ترقی کا باعث ہے جبکہ فیصلہ سازی اور وسائل تک خواتین کی رسائی بھی موجودہ وقت کا تقاضہ ہے ۔
بعد ازاں وائس چانسلر وومن یونیورسٹی ڈاکٹر کلثوم پراچہ نے بھی تقریب سے خطاب کیا۔تقریب میں ایڈیشنل ڈپٹی کمشنر جنرل عابدہ فرید ،وائس چانسلر ڈاکٹر کلثوم پراچ معروف گلوکارہ راحت بانو ملتانیکر،پروفیسر روبینہ ترین،میڈم عمارہ خٹک اور مہناز خاکوانین کی خصوصی شرکت کے علاوہ وومن یونیورسٹی کی طالبات اور سول سوسائٹی کی خواتین نے بھرپور شرکت کی اور اس اقدام کو سراہا۔
