راولپنڈی،17اگست (اے پی پی):نگران وزیراعلیٰ پنجاب محسن نقوی نے بینظیر بھٹو ہسپتال راولپنڈی کا دورہ کیا۔ اس موقع پر صوبائی وزیراطلاعات عامر میر بھی ہمراہ تھے۔
وزیراعلیٰ محسن نقوی نے ہسپتال کی نئی ایمرجنسی میں علاج معالجے کا جائزہ لیااورمریضوں اور تیمارداروں سے مہیا کردہ طبی سہولتوں اورمفت ادویات کی دستیابی کے بارے پوچھا۔انہوں نے مریضوں سے بر وقت چیک اپ کے بارے میں استفسار کیا،جس پر مریضوں اور تیمارداروں نے چیک اپ اور ایکسرے میں تاخیر کے حوالے سے شکایات کیں۔جبکہ بعض ڈاکٹرز اور عملہ بھی موجود نہیں تھا۔
وزیراعلیٰ محسن نقوی نے ڈاکٹرز کو مریضوں کے فوری چیک اپ کی ہدایت کی۔انہوں نے کہا کہ ایمرجنسی میں مریض کے چیک اپ میں ایک لمحے کی بھی تاخیر نہیں ہونی چاہیے۔ مریضوں کومفت ادویات کی فراہمی ہر صورت یقینی بنائی جائے۔
وزیر ا علی نے استقبالیہ کاؤنٹر پر مریضوں کی رجسٹریشن کا عمل جلد از جلد مکمل کرنے کا حکم دیا،ایمرجنسی میں صفائی کی صورتحال کا جائزہ لیااور مریضوں کی عیادت کی اور ایمرجنسی میں طبی سہولتوں کا بھی جائزہ لیا۔
