لاہور،17اگست (اے پی پی):نگران وزیر اعلی پنجاب محسن نقوی سے ایشیائی ترقیاتی بینک کی ڈائریکٹر برائے واٹر اینڈ اربن ڈویلپمنٹ سیکٹر جنگمن ہوانگ کی قیادت میں وفد نے جمعرات کو یہاں وزیر اعلی آفس میں ملاقات کی جس میں پنجاب میں ایشیائی ترقیاتی بینک کے تعاون سے جاری منصوبوں پر پیشرفت کے حوالے سے تبادلہ خیال کیا گیا اور زراعت، فارم ٹومارکیٹ روڈز، واٹر ریسورس مینجمنٹ اور اربن ڈویلپمنٹ کے شعبوں میں تعاون کو مزید فروغ دینے پر اتفاق کیا گیا۔
محسن نقوی نے اے ڈی بی کی ڈائریکٹر برائے واٹراینڈ اربن ڈویلپمنٹ سیکٹر سے گفتگو کرتے ہوئے کہا کہ ایشیائی ترقیاتی بینک پنجاب حکومت کا ترقی و خوشحالی کے سفر میں بہترین پارٹنر ہے،پنجاب میں ایشیائی ترقیاتی بینک کے تعاون سے جاری منصوبوں کی بروقت تکمیل ہماری ترجیح ہے ۔انہوں نے کہا کہ زراعت، واٹر مینجمنٹ اور اربن ڈویلپمنٹ سیکٹرز میں اے ڈی بی سے مزید اشتراک چاہتے ہیں، اے ڈی بی کے تعاون سے گرین پراجیکٹ کا دائرہ کار پورے پنجاب تک بڑھانے کا پروگرام ہے،شہروں میں شہری سہولتوں کی بہتری کے پروگرام پر اے ڈی بی کے شکرگزار ہیں ۔
ڈائریکٹر ایشیائی ترقیاتی بینک جنگمن ہوانگ نے کہا کہ نگران وزیر اعلی محسن نقوی اوران کی ٹیم نے اے ڈی بی کے پروگرام کو آگے بڑھانے میں انتھک محنت سے کام کیا ہے اوروزیر اعلی کی قیادت میں پنجاب حکومت نے اے ڈی بی کے منصوبوں کو تیزی سے آگے بڑھایا ہے۔انہوں نے کہا کہ پنجاب حکومت کے ساتھ مختلف شعبوں میں مزید تعاون بڑھائیں گے۔
وفد میں اے ڈی بی کے اربن ڈویلپمنٹ کے حکام ژی جیائی لیو ، پاکستان ریذیڈنٹ مشن اربن یونٹ کے سربراہ شوکت شفیع،ِ سینئر پراجیکٹ آفیسر سید عمر علی شاہ اور بینک کے صوبائی پراجیکٹ کوآرڈینیٹر عمران سکندر بلوچ شامل تھے جبکہ صوبائی وزیر بلدیات واطلاعات عامیر میر،چیف سیکرٹری، چیئرمین پلاننگ اینڈ ڈویلپمنٹ بورڈ، سیکرٹری لوکل گورنمنٹ، سیکرٹری ہائوسنگ اور متعلقہ حکام بھی اس موقع پر موجود تھے۔
