لاہور، یکم اگست(اے پی پی):نگران وزیراعلیٰ پنجاب محسن نقوی نے نظریہ پاکستان روڈ کا دورہ کیا اور نظریہ پاکستان روڈ پر بنائے گئے پروٹیکٹیڈ یو ٹرنز کو ٹریفک کے لیے کھول دیا۔محسن نقوی نے کہا کہ نظریہ پاکستان روڈ پر ٹریفک کے مسائل حل کرنے کے لیے یوٹرنز بنائے گئے ہیں۔شوکت خانم ہسپتال چوک کو بھی سگنل فری بنا دیا گیاہے،شہر کے اس اہم پوائنٹ کو سگنل فری بنانے سے یومیہ 45 ہزار گاڑیوں کوآمدورفت میں سہولت ملے گی۔
نگران وزیراعلیٰ پنجاب محسن نقوی نے کہا کہ واپڈا ٹاؤن، کینال بنک روڈ، جوہر ٹاؤن اور ملحقہ علاقوں کے رہائشی مستفید ہو سکیں گے،منصوبے کی بروقت تکمیل پر کمشنر و ڈی جی ایل ڈی اے محمد علی رندھاوا،چیف انجینئر اسرار سعید اور انکی ٹیم شاباش کی مستحق ہے۔
کمشنر لاہور و ڈی جی ایل ڈی اے محمد علی رندھاوا اور چیف انجینئر اسرار سعید نے وزیراعلی پنجاب کو بریفنگ دیتے ہوئے کہا کہ اس منصوبے کو 15 روز میں مکمل کیا گیا ہے اور ترقیاتی کاموں کے دوران ٹریفک کی روانی کو برقرار رکھا گیا ہے،نظریہ پاکستان روڈ پر غفار چوک پر یو ٹرن بنایا گیا ہے۔
نگران وزیراعلیٰ محسن نقوی نے میڈیا سے گفتگوکرتے ہوئے کہا کہ پنجاب میں یونیورسٹیوں میں ہراسگی کے واقعات کے سدباب کیلئے خاتون صوبائی سیکرٹری کی سربراہی میں کمیٹی قائم کی جائے گی،طالبات کی پروٹیکشن کیلئے خاتون پروفیسرز کی سربراہی میں ہراسمنٹ سیل قائم ہوں گے۔انہوں نے کہا کہ صوبائی اوریونیورسٹی لیول پر ہراسمنٹ سیل دو دن میں کام شروع کردیں گے۔اسلامیہ یونیورسٹی بہاولپور سکینڈل کی تحقیقات کیلئے عدالت عالیہ کو جج نامز د کرنے کی درخواست دی ہے،امید ہے نامزدگی کے 15دن کے اندر رپورٹ سامنے آجائے گی۔
نگران وزیراعلیٰ محسن نقوی نے کہا کہ والدین کیلئے یونیورسٹیوں میں زیر تعلیم بچیوں کے تحفظ کے احساس کو یقینی بنانا چاہتے ہیں،بہاولپورسکینڈل میں کچھ حقیقت ہے اورکچھ مبالغہ آرائی سے کام لیا گیا،ایف آئی اے سمیت اداروں کی رپورٹس آچکی ہیں لیکن جوڈیشنل کمیشن کی رپورٹ حتمی تصور کی جائے گی،جو بھی ملوث ہوا سزا سے نہیں بچ سکے گا۔
نگران وزیراعلیٰ محسن نقوی نے کہا کہ نظریہ پاکستان روڈ کو مکمل طورپر سگنل فری کرنے کیلئے مزید دو یوٹرن بنائے جائیں گے، ڈی جی ایل ڈی اے کے موثر فالواپ کی وجہ سے ترقیاتی منصوبوں کی جلد تکمیل ممکن ہورہی ہے۔انہوں نے کہا کہ محرم الحرام اللہ کے فضل و کرم سے پرامن گزرا اوراب پولیس کی پوری توجہ جرائم پیشہ افراد کی سرکوبی پر ہوگی، جرائم کی شرح میں کمی آرہی ہے اورانشاء اللہ جلد مزید کمی آئے گی۔پولیس مقابلوں کا تاثر درست نہیں،جو پولیس پر گولی چلائے گا اسے ایسے ہی جواب ملے گا۔
صوبائی وزراء عامر میر،منصور قادر،سی سی پی او،کمشنر،ڈپٹی کمشنر،سی ٹی او،چیف انجینئر ایل ڈی اے اوردیگرحکام بھی موجود تھے۔
