پنڈی بھٹیاں،04اگست(اے پی پی):پنجاب فوڈ اتھارٹی نے مضر صحت سوڈا واٹر اور آئس کریم تیار کرنے والوں کے خلاف ایکشن لیتے ہوئے دو یونٹ سیل کر دیئے ہیں اور تیار آئس کریم اور سوڈا واٹر کی بوتلیں ضائع کردی ہیں۔
پنجاب فوڈ اتھارٹی ٹیموں نے سٹی پنڈی بھٹیاں میں مضر صحت آئس کریم اور سوڈا واٹر یونٹس کا معائنہ کیا اور فوڈ اتھارٹی ٹیم نے 2 یونٹس کو سیل کردیا۔ سوڈا واٹر یونٹ میں استعمال شدہ بوتلیں اور ڈھکن استعمال کئے جارہے تھے جبکہ صفائی کی بھی انتہائی ناقص انتظامات تھے جبکہ آئس لولیز بنانے والے یونٹ میں بھی حفظان صحت کے اصولوں کی سنگین خلاف ورزیوں پر آئس لولیز بنانے والا یونٹ بھی سیل کر دیا گیا ہے۔
پنجاب فوڈ اتھارٹی ٹیموں نے یونٹ میں تیار
900 سے زائد قلفیاں،126لیٹر سوڈا واٹر، بھاری مقدار میں ممنوعہ اجزاء تلف کر دیں، سوڈا واٹر کی تیاری میں مصنوعی مٹھاس اور کھلے رنگوں کا استعمال کیا جا رہا تھا، موقع پر کیے گئے ٹیسٹ فیل ہونے پر کارروائی عمل میں لائی گئی۔
فوڈ اتھارٹی ٹیم کے مطابق سوڈا واٹر کی پیکنگ کے لیے استعمال شدہ بوتلیں، زنگ آلود ڈھکن استعمال کیے جا رہے تھے ان اشیاء کی تیاری میں غیر معیاری اجزاء کا استعمال پھیپھڑوں اور گردوں میں انفیکشن کا باعث بنتا ہے، غیر معیاری اشیاء خورونوش کی تیاری اور فروخت ناقابل معافی جرم ہے۔عوام کی صحت ساتھ کھلواڑ کرنے والوں کیخلاف کارروائیوں کا سلسلہ جاری رہے گا اور خلاف ورزی کر رہے ہیں والوں کو سخت سخت سزا دی جائے گی۔
