پشاور، 29ستمبر (اے پی پی): آئی جی پولیس خیبرپختونخوا اختر حیات گنڈاپور اور چیف سیکرٹری اسلم چوہدری نے آج ضلع ہنگو میں دوآبہ پولیس سٹیشن کا دورہ کیا اور خود کش حملے سے شہید ہونے والی مسجد کا جائزہ لیا اور جوانوں سے بات چیت کی۔
آئی جی اختر حیات گنڈا پور نے اس موقع پر میڈیا سے گفتگو کرتے ہوئے کہا کہ خیبر پختونخواہ پولیس بہادر جوانوں کی پولیس ہے، جو ہر محاذ پر دہشت گردوں کا مقابلہ کر رہی ہے۔ انہوں نے کہا کہ آج بھی دو خودکش حملہ آور جمعہ کی نماز کے دوران مسجد میں گھسنا چاہتے تھے، لیکن دوآبہ پولیس کے جوانوں نے بہادری کا مظاہرہ کرتے ہوئے مین گیٹ پر خود کش بمبار کو روکا جس کی وجہ سے جانی نقصان کم ہوا۔
آئی جی خیبر پختونخواہ نے کہا کہ ہم اپنی پولیس کے مسائل کو حل کرنے کیلئے پالیسی بنا رہے ہیں اور دہشت گردی کے واقعات کی روک تھام کیلئے تمام وسائل بروے کار لا رہے ہیں۔انہوں نے مزید کہا کہ دوآبہ پولیس کو جواں مردی سے دہشت گردوں کو روکنے پر خراج تحسین پیش کرتا ہوں۔
