برسلز،25ستمبر (اے پی پی):برسلز میں پاکستانی سفارت خانے نے ایمبیسیڈر ضمیر اکرم کی “دی سیکیورٹی امپریٹیو – پاکستانز نیوکلیئر ڈیٹرنس اینڈ ڈپلومیسی” کے عنوان سے کتاب کی تقریب رونمائی کا اہتمام کیا۔ یہ تقریب برسلز پریس کلب میں منعقد ہوئی جس میں برسلز میں مقیم سفیروں، سفارتی کور کے ارکان، اور تھنک ٹینک کمیونٹی اور تعلیمی اداروں کے نمائندوں نے شرکت کی۔
اس موقع پر اظہار خیال کرتے ہوئے ضمیر اکرم نے کہا کہ پاکستان کا جوہری ڈیٹرنس کسی طرح کی بالادستی یا طاقت کے عزائم کے لئے نہیں بلکہ یہ انتہائی، وجودی اور ابھرتے ہوئے سیکورٹی چیلنجز سے متعلق ہے۔ انہوں نے اس بات پر زور دیا کہ یہ کتاب نیوکلیئر ڈیٹرنٹ صلاحیت کے حصول کے لیے پاکستان کی سفارت کاری کے ذریعے ادا کیے جانے والے اہم کردار کے بارے میں ایک پریکٹیشنر کی بصیرت فراہم کرتی ہے۔
اس موقع پر یورپی یونین، بیلجیئم اور لکسمبرگ میں پاکستان کی سفیر آمنہ بلوچ نے اپنے کلمات میں سفیر ضمیر اکرم کے پاکستان کی نیوکلیئر ڈپلومیسی کو اجاگر کرنے میں ان کے کردار کو سراہا۔ انہوں نے عالمی چیلنجوں سے نمٹنے کے لیےباہم منسلک دنیا میں تعاون کو فروغ دینے کی ضرورت پر زور دیا۔
سفیر ضمیر اکرم کی کتاب کی رونمائی کے بعد شرکاء کے ساتھ نیوکلیئر ڈیٹرنس کے مختلف پہلوئوں ، اقوام متحدہ کی تخفیف اسلحہ کی مشینری کے مستقبل اور علاقائی اور عالمی سلامتی کے چیلنجوں سے نمٹنے کے راستے پر بات چیت کی گئی۔
پاکستان کی فارن سروس میں ایک طویل اور شاندار کیرئیر کے ساتھ، سفیر ضمیر اکرم آرمز کنٹرول اور تخفیف اسلحہ ڈپلومیسی کے شعبے میں ایک قابل احترام اتھارٹی ہیں۔ ان کی آخری ذمہ داری جنیوا میں اقوام متحدہ اور بین الاقوامی تنظیموں میں پاکستان کے مستقل نمائندہ کی تھی جس میں تخفیف اسلحہ کی کانفرنس بھی شامل ہے۔ وہ اس وقت اسٹریٹجک پلانز ڈویژن کے مشیر کے طور پر خدمات انجام دے رہے ہیں۔
