بھکر،12 ستمبر(اے پی پی): ڈپٹی کمشنر ڈاکٹر نور محمد اعوان نے ڈی سی آفس میں قائم کردہ کنٹرول روم کا دورہ کیا۔ وزیر اعلیٰ پنجاب کے انقلابی پروگرام “اب گاوں چمکیں گے” کے حوالے سے دیہی یونین کونسلوں میں جاری کلین آپریشن اور دیگر انتظامی امور کی جاری سرگرمیوں کا ڈیش بورڈ پر معائنہ کرتے ہوئے متعلقہ تحصیلوں کے اسسٹنٹ کمشنرز ،لوکل گورنمنٹ کے افسران سمیت پروگرام کے فوکل پرسنز کیساتھ ٹیلیفونک رابطہ،دیہی یونین کونسلوں میں جاری کام کی رفتار کو مزید تیز بنانے کیلئے احکامات جاری کئے۔
ڈپٹی کمشنر ڈاکٹر نور محمد اعوان نے کہا کہ عوام کو گھر کی دہلیز پر سہولیات کی فراہمی کا عمل یقینی بنانا پروگرام کا خاصا ہے اور یہی اس کا بنیادی مقصد ہے۔انہوں نے ضلع کی دیہی یونین کونسل کی روزانہ بنیاد پر کارکردگی کو مزید موثر بنانے کیلئے متعلقہ ذمہ داران کو خصوصی گائیڈ لائنز جاری کیںاور کہا کہ” اب گاوں چمکیں گے“پروگرام کی افادیت مانند نہ پڑنے پائے ،اس سلسلہ میں حکومت پنجاب کے فراہم کردہ وسائل سے بھرپور استفادہ کیا جائے۔
ڈپٹی کمشنر نے ضلع میں فرٹیلائزر طلب و رسد کا بھی جائزہ لیا اور ڈیش بورڈ پر روزانہ کی بنیاد پر اپ ڈیٹ ہونے والے ڈیٹا کی رپورٹس کا جائزہ لیا۔انہوں نے کہا کہ پرائس کنٹرول مجسٹریٹس متحرک انداز میں اپنی سونپی گئی ذمہ داریاں مکمل کریں اور کنٹرول ریٹس پر کھادوں کی دستیابی کا عمل یقینی بنائیں اور غیر معاون عناصر کے خلاف سخت کارروائی کی جائے ۔
