اسلام آباد،21ستمبر(اے پی پی): صدر پاکستان ہاکی فیڈریشن بریگیڈیر( ر) خالد سجاد کھوکھر نے سیکرٹری جنرل پی ایچ ایف(پاکستان ہاکی فیڈریشن) حیدر حسین کے ہمراہ ایشین گیمز میں شرکت کرنے والی پاکستان ہاکی ٹیم سے ملاقات کی۔
پاکستان ہاکی فیڈریشن کی جانب سے قومی ہاکی ٹیم کے لئے نیک خواہشات کا اظہار کیا گیا۔ صدر پی ایچ ایف بریگیڈیئر(ر) ر خالد سجاد کھوکھر نے کھلاڑیوں سے خطاب کرتے ہوئے انکو وطن عزیز کی ایشین گیمز میں بھرپور نمائندگی کرنے اور سبز ہلالی پرچم کی سربلندی کے لئے ہرممکن کاوشوںکو بروئے کار لانے کی تلقین کی۔
انہوں نے کھلاڑیوں کو تحریکی لیکچر دیتے ہوئے کہا کہ میں قوی امید رکھتا ہوں کہ آپ پاکستان ، پاکستان ہاکی اور پاکستان ہاکی فیڈریشن کی ایشین گیمز میں بھرپور نمائندگی کرینگے اور شاندار کارکردگی کا مظاہرہ کرتے ہوئے فتح کے ساتھ وطن واپس لوٹیں گے۔
صدر پی ایچ ایف بریگیڈیئر (ر) خالد سجاد کھوکھر نے مزید کہا کہ پاکستان ہاکی ٹیم میں زیادہ تر جونیئر ہاکی ٹیم کے باصلاحیت کھلاڑی شامل ہیں جو اپناعمدہ کھیل وکارکردگی دکھانے کے لئے پرجوش وپرعزم ہیں۔
اس موقع پر انکے ہمراہ سیکرٹری جنرل پاکستان ہاکی فیڈریشن سید حیدر حسین، منیجر پاکستان ہاکی ٹیم برائے ایشین گیمز سعید خان، کوچ اولمپئن دلاور حسین ، ممبر سلیکشن کمیٹی پی ایچ ایف رانا محمد شفیق ، کانگریس ممبر پی ایچ ایف شجاع اقبال راجہ، ڈی ایچ اے راولپنڈی کے عہدیداران شاہد اقبال راجہ، محمدیاسین، صدر اسلام آباد ہاکی ایسوسی ایشن محمد ارشد سمیت دیگر عہدیداران موجود تھے۔
