لاہور۔04 ستمبر( اے پی پی): نگران صوبائی وزیر صحت ڈاکٹر جاوید اکرم نے محکمہ سپیشلائزڈ ہیلتھ کیئر اینڈ میڈیکل ایجوکیشن میں ایدھی فاؤنڈیشن کے سربراہ فیصل ایدھی سے ملاقات کی۔نگران صوبائی وزیر صحت ڈاکٹر جاوید اکرم نے فیصل ایدھی کو خدمت انسانیت کرنے پر یادگاری شیلڈ بھی پیش کی۔نگران صوبائی وزیر محکمہ صحت و سوشل ویلفیئر اینڈ بیت المال ڈاکٹر جاوید اکرم نے محکمہ سپیشلائزڈ ہیلتھ کیئر اینڈ میڈیکل ایجوکیشن میں اہم اجلاس کی صدارت بھی کی۔اس موقع پر چئیرمن بورڈ آف مینجمنٹ پنجاب انسٹی ٹیوٹ آف کارڈیالوجی ڈاکٹر فرقد عالمگیر بھی موجود تھے۔اجلاس میں سیکرٹری محکمہ سوشل ویلفیئر اینڈ بیت المال ظہور حسین، ڈی جی مدثر ریاض ملک، ڈائریکٹرز و دیگر افسران نے شرکت کی۔اجلاس میں ایڈیشنل سیکرٹری ٹیکنیکل محکمہ سپیشلائزڈ ہیلتھ کیئر اینڈ میڈیکل ایجوکیشن ڈاکٹر حافظ شاہد لطیف نے شرکت کی۔اجلاس میں ایگزیکٹو ڈائریکٹر پنجاب انسٹی ٹیوٹ آف مینٹل ہیلتھ پروفیسر ڈاکٹر فرخ عبداللہ، کنگ ایڈورڈ میڈیکل یونیورسٹی سے پروفیسر آف سائیکیٹری پروفیسر ڈاکٹر علی مدیح ہاشمی و دیگر افسران نے شرکت کی۔کمشنر ملتان ڈویژن عامر خٹک اور تارے زمین پر تنظیم سے ڈاکٹر فادیہ نے وڈیو لنک کانفرنس کے ذریعے اجلاس میں شرکت کی۔نگران صوبائی وزیر صحت ڈاکٹر جاوید اکرم نے اجلاس کے دوران ایدھی ویلفیئر سنٹر ملتان سے ذہنی معذوری کا شکار مریضوں کے علاج و معالجہ اور منتقلی کے اقدامات کا تفصیلی جائزہ لیا۔متعلقہ افسران اور کمشنر ملتان ڈویژن نے نگران صوبائی وزیر صحت ڈاکٹر جاوید اکرم کو اس حوالہ سے بریفننگ دی۔نگران صوبائی وزیر صحت ڈاکٹر جاوید اکرم نے اس موقع پر اظہار خیال کرتے ہوئے کہا کہ آج فیصل ایدھی سے ایدھی ویلفیئر سنٹر ملتان میں موجود ذہنی معذوری کا شکار افراد کی بحالی کیلئے اقدامات کے حوالہ سے تبادلہ خیال ہوا ہے۔ حکومت پنجاب ایدھی ویلفیئر سنٹر ملتان میں ذہنی معذوری کا شکار افراد کی بحالی کیلئے ایدھی فاؤنڈیشن سے ہر ممکن تعاون کرے گی ،ایدھی ویلفیئر سنٹر ملتان کے ذہنی معذوری کا شکار افراد کی بحالی کیلئے کاوش کرنے پر سیکرٹری سوشل ویلفیئر اینڈ بیت المال ظہور حسین اور کمشنر ملتان ڈویژن عامر خٹک کو شاباش دیتا ہوں۔ ایدھی ویلفیئر سنٹر ملتان میں ذہنی معذوری کا شکار افراد کی بحالی کیلئے ہر ممکن قدم اٹھائیں گے۔ایدھی ویلفیئر سنٹر ملتان سے لائے گئے ذہنی معذوری کا شکار افراد کی انسٹی ٹیوٹ آف مینٹل ہیلتھ میں دوبارہ اسیسمنٹ کروائی جا رہی ہے۔انہوں نے کہا کہ ذہنی معذوری کا شکار افراد کی بحالی کیلئے ہم سب کو اپنا کردار ادا کرنا چاہئے۔محکمہ صحت اور محکمہ سوشل ویلفیئر اینڈ بیت المال ذہنی معذوری کا شکار افراد کی بحالی کیلئے بنیادی اقدامات اٹھا رہے ہیں۔ وزیر اعلیٰ پنجاب کو ذہنی معذوری کا شکار افراد کی بحالی واسطے خصوصی گرانٹ کیلئے سمری پیش کی جائے گی۔ ڈاکٹر جاوید اکرم نے کہا کہ ذہنی معذوری کا شکار افراد ہمارے گھر کے فرد ہیں اور ان کو اچھی زندگی فراہم کرنا ریاست کی بنیادی ذمہ داری ہے۔
