لاہور5ستمبر ( اے پی پی ): نگران وزیراعلیٰ پنجاب محسن نقوی اور سینیٹر اسحاق ڈار نے آج حضرت داتا گنج بخش علی بن عثمان الہجویری ؒؒ کے مزار پرچادر پوشی کر کے980ویں عرس کی تقریبات کا باقاعدہ افتتاح کیا۔ قاری صداقت علی شاہ نے تلاوت قرآن پاک اور عمر چشتی اور ہمنو ا نے ثناء خوانی کی سعادت حاصل کی۔ وزیراعلیٰ محسن نقوی او رشرکاء نے حضرت داتا گنج بخش علی بن عثمان الہجویری ؒؒ کے مزار پر حاضری دی اور ملک و قوم کی ترقی اور عوام کی خوشحالی کے لئے دعا کی۔نگران وزیراعلیٰ محسن نقوی نے دودھ کی سبیل کا باقاعدہ آغاز کیا۔وزیراعلیٰ محسن نقوی نے حضرت داتا گنج بخش ؒ کے بارے میں ڈاکٹر طاہر رضا کی کتب کی رونمائی بھی کی۔محسن نقوی نے کہاکہ لاہور سمیت دنیا بھر میں حضرت داتا گنج بخش ؒ کے عقیدت مندوں کو عرس کی مبارکباد پیش کرتا ہوں۔ 3روزہ عرس کے دوران عقیدت مندوں کو تمام ممکنہ سہولتیں فراہم کریں گے۔ لنگر خانے میں عقیدت مندوں کو منظم طریقے سے کھانا پیش کرنے کا اہتمام کیاگیاہے۔ دودھ کی سبیل میں عقیدت مندوں کے لئے اچھے انتظامات کئے گئے ہیں۔ عرس کی تقریبات میں شرکت کے لئے آنے والے ہمارے مہمان ہیں ان کا بھرپو رخیال رکھیں گے۔ حضرت داتا گنج بخش ؒسمیت بزرگان دین نے برصغیر میں امن و آشتی کا درس دیا۔سابق وفاقی وزیر اسحاق ڈار،صوبائی وزیر اوقاف اظفر علی ناصر،صوبائی وزیر اطلاعات عامر میر، ایڈیشنل چیف سیکرٹری،ایڈیشنل چیف سیکرٹری داخلہ،سیکرٹری اوقاف،کمشنر لاہورڈویژن،سی سی پی او،ڈی آئی جی آپریشنز،سیکرٹری وزیراعلیٰ، سیکرٹری وزیر اعلیٰ کوآرڈینیشن،بلال یاسین،میاں مجتبٰی الرحمن، عزیز الرحمن چن،مدینہ فاؤنڈیشن کے میاں رشید،علمائے کرام و مشائخ عظام اور ہزاروں عقیدت مندوں نے عرس مبارک کی تقریب میں شرکت کی۔
