لاہور،30ستمبر (اے پی پی):نگران وزیر اعلی پنجاب محسن نقوی نے جمعہ کی رات گئے مختلف تھانو ں کا دورہ کیا۔وزیراعلی نے تھانہ فیکٹری ایریا شیخوپورہ اور تھانہ شفیق آباد بند روڈ کا معائنہ کیا۔وزیراعلی محسن نقوی نے تھانہ فیکٹری ایریا شیخوپورہ میں موبائل چوری و ڈکیتی کی درخواستوں پر24گھنٹے میں ایف آئی آرز کا اندراج نہ ہونے پر شدید برہمی کااظہار کیا اورایس ایچ او کو فوری طور پر عہدے سے ہٹانے کاحکم دیا۔
وزیراعلی محسن نقوی نے کہاکہ مقرر ہ مدت کے اندردرخواستوں پر کارروائی کرتے ہوئے مقدمہ درج ہونا چاہیے اور مقدمے کے اندراج میں تاخیر کسی صورت برداشت نہیں کی جائیگی۔انہوں نے اس سلسلے میں انسپکٹر جنرل پولیس کو فوری طور پر ہدایات جار ی کیں۔انہوں نے دونوں تھانوں میں فرنٹ ڈیسک پر شہریوں کی درخواستوں پر ہونے والی پیشرفت کا بھی جائزہ لیا۔
محسن نقوی نے فرنٹ ڈیسک،مال خانے، محرر روم، انویسٹی گیشن روم اور دیگر شعبوں کا جائزہ لیا۔انہوں نے حوالات میں ملزمان سے ان کے کیسز کے بارے پوچھا، سود کی رقم واپس نہ کرنے اور چیک بائونس کیس کا تھانہ شفیق آباد کی حوالات میں بند ایک ملزم اپنی داستان سناتے رو پڑا۔
وزیر اعلی محسن نقوی نے دلاسہ دیا اور انصاف فراہم کرنے کی یقین دہانی کرائی اور ملزم کے ذمہ واجب الااد رقم ادا کرنے کا اعلان کرتے ہوئے ہدایت کی کہ رہائی کے لیے تمام قانونی کارروائی پوری کی جائے۔انہوں نے سود کا کاروبار کرنے والے عناصر کے خلاف کریک ڈائون کا حکم بھی دیا۔
شفیق آباد تھانے میں موجود خواتین سائلین نے وزیر اعلی محسن نقوی کو اپنے کیس سے آگاہ کیا جس پر وزیر اعلی نے خواتین کی درخواست پر قانون کے مطابق کارروائی کا حکم دیا۔وزیر اعلی محسن نقوی نے تھانہ شفیق آباد کے مال خانہ کو بہتر جگہ منتقل کرنے کی ہدایت کی۔
صوبائی وزیر اطلاعات عامر میر، انسپکٹر جنرل پولیس پنجاب اور سی سی پی او لاہور بھی اس موقع پر ان کے ہمراہ تھے۔
