پشاور،6 ستمبر(اے پی پی): چیف ٹریفک آفیسر پشاور قمر حیات خان کی ہدایت پرسٹی ٹریفک پولیس پشاور کے زیراہتمام سیکاس یونیورسٹی میں ٹریفک قوانین سے متعلق آگاہی سیمینارکا انعقاد ہوا۔آگاہی سیمینارمیں ایس پی ایجوکیشن شازیہ شاہد اور ٹریفک ایجوکیشن ٹیم نے طلباء و طالبات کو آگاہی دی۔
اس موقع پر ایس پی ایجوکیشن پشاور شازیہ شاہد نے کہا ہے کہ شہری ہمیشہ سیٹ بیلٹ باندھ کر لائن ڈسپلن اور دوسری گاڑیوں کا خیال رکھتے ہوئے گاڑی چلائیں دوران ڈرائیونگ موبائل فون کے استعمال سے گریز کریں۔ انہوں نے کہا کہ ٹریفک قوانین پر عملدرآمد یقینی بنانے کیلئے آگاہی انتہائی ضروری ہے ، دوران سفر سیٹ بیلٹ اور ہیلمٹ کے استعمال سے ٹریفک حادثات اور جانی نقصان سے بچا جا سکتا ہے دوران ڈرائیونگ روڈ سیفٹی و سکیورٹی کا خاص خیال رکھتے ہوئے صبر و تحمل سے گاڑی چلانی چاہئے۔
ایس پی ایجوکیشن نے کہا کہ سٹی ٹریفک پولیس پشاور کے حکام اور اہلکار پرائمری مڈل اور میٹرک تک سکول کے طلبہ کو باقاعدہ روڈ کراسنگ اور اشاروں سمیت دیگر ٹریفک قوانین بارے آگاہی دیتے ہیں تاکہ وہ بچپن ہی سے ٹریفک قوانین سے آگاہ ہوں۔
اس موقع پر سیکاس یونیورسٹی کی ڈاکٹر ندرت نے ٹریفک قوانین بارے سیمینار کے انعقاد پر آئی جی خیبر پختونخواہ اختر حیات خان ، سی سی پی او پشاور سید اشفاق انور اور چیف ٹریفک آفیسر قمر حیات خان کا شکریہ ادا کیا اور ڈی ایل وین کے ذریعے فیکلٹی ممبران اور طلبہ کو ڈرائیونگ لائسنس جاری کرنے کے اقدام کو سراہا۔ انہوں نے امید ظاہر کی کہ آئندہ بھی طلبہ کیلئے ایسے سیمیناز کا انعقاد کیا جائیگا۔
