ڈیرہ غازی خان،17ستمبر(اے پی پی ):گھڑ سواری کے شوقین شہریوں کے لیے ڈیرہ غازی خان پولیس کی طرف سے تربیتی کورسز شروع کر دئیے گئے ہیں ۔
ترجمان ڈیرہ غازی خان پولیس نے اے پی پی کو بتایا کہ آئی جی پنجاب ڈاکٹر عثمان انور کے ویژن کے مطابق پولیس کی جانب سے شہریوں کو تمام تر سہولیات کی فراہمی کا سلسلہ جاری ہے اور شہریوں کے لیے ڈیرہ غازی خان پولیس لائنز میں ہارس رائیڈنگ کورس کا آغاز کر دیا گیا ہے۔انہوں نے بتایا کہ گھڑ سواری کے اس تربیتی کورس میں تمام شہری مرد و خواتین کے علاوہ بچے بھی داخلہ لے سکتے ہیں اور اس کے لیے پولیس کی طرف سے صرف 5ہزار روپے ماہانہ فیس مقرر کی گئی ہے۔انہوں کہا کہ کورسز میں شرکاء کے لیے پولیس لائنز میں شہریوں کی سہولت کے لیے صبح اور شام کے اوقات الگ الگ کلاسز اور گھڑ سواری کی تربیت دی جاتی ہے۔ انہوں نے کہا کہ اس مقصد کے لیے پولیس کے پاس اعلیٰ نسل کے 10گھوڑے دستیاب ہیں۔انہوں کہا کہ شہری مزید معلومات اور داخلے کے لیے موبائل نمبر 03358852002 پر رابطہ کر سکتے ہیں۔
