پشاور،23 اکتوبر(اے پی پی): گورنر خیبر پختونخوا حاجی غلام علی نے کہا ہے کہ آئی ایم سائنسز نے 20 سال تعلیمی ترقی کا ایک کامیاب سفر طے کیا ہے، اسلئے آئی ایم سائینز کا عالمی سطح پر بہترین رینکنگ کی فہرست میں شامل ہونا ہدف ہونا چاہئے۔
گورنر خیبر پختونخوا حاجی غلام علی نے آج آئی ایم سائنسز حیات آباد کا دورہ کیا، جس میں انہوں نے وزیراعظم یوتھ لیپ ٹاپ اسکیم کے تحت لیپ ٹاپ تقسیم تقریب میں بحیثیت مہمان خصوصی شرکت کی۔
گورنر خیبر پختونخوا حاجی غلام علی نے بیچلر آف بزنس منیجمنٹ کے 210 طلباء وطالبات میں لیپ ٹاپ تقسیم کئے
گورنر خیبر پختونخوا نے آئی ایم سائنسز حیات آباد میں لیپ ٹاپ تقسیم کی تقریب سے خطاب کرتے ہوئے کہا کہ ہمارے نوجوانوں نے جدید ٹیکنالوجی سے دنیا میں چیلینجز کا مقابلہ کرنا ہے، اسلئے یونیورسٹیز کا دورہ کر کے مسائل سمجھنے، کوتاہیوں کو دور کرنے کیلئے اقدامات اٹھا رہا ہوں، کیونکہ میں خود کو یونیورسٹیز کا چانسلر نہیں بلکہ طلبہ و اساتذہ کا خادم سمجھتا ہوں۔
انہوں نے کہا کہ طلبہ کو لیپ ٹاپ فراہم کر دیئے باقی بھی تمام سہولیات فراہم کریں گے، طلبہ لیپ ٹاپ کو صرف ایک مشین نہیں بلکہ علمی ترقی کا ہتھیار سمجھیں، جدید ٹیکنالوجی و جدید سہولیات سے فاصلے سمٹ گئے ہیں جس کا مثبت استعمال یقینی بنانا ہے۔
گورنر نے کہا کہ تمام والدین کی خواہش ہوتی ہے کہ انکے بچے بہترین شہرت کے حامل تعلیمی اداروں سے تعلیم حاصل کریں، ملک میں آبادی کا زیادہ طبقہ نوجوانوں پر مشتمل ہے اور انہوں نے ہی ملک کی تمام شعبوں میں ترقی کیلئے اپنا کردار ادا کرنا ہے، اور اس مقصد کیلئے اعلیٰ تعلیم یافتہ نوجوانوں کی سوچ و ویژن بھی بڑی ہونی چاہئے۔
بعدازاں گورنر نے آئی ایم سائینز کے اکیڈمک بلاک، اسپورٹس جمنازیم، زیر تعمیر بلاک کا بھی دورہ بھی کیا۔
تقریب میں سابق نگران صوبائی وزراء عدنان جلیل، فضل الٰہی، ڈائریکٹر آئی ایم سائینز پروفیسر ڈاکٹر عثمان غنی سمیت طلبہ و طالبات، والدین شریک تھے۔
