ڈیرہ غازی خان،23اکتوبر(اے پی پی): پولیس نے کارروائی کے دوران نان کسٹم پیڈ نمک،خشک دودھ،سگریٹ اور کپڑا برآمد کر کے کسٹم حکام کے حوالے کر دیا۔
ڈی پی او ڈیرہ غازی خان احمد محی الدین کی ہدایت پر سمگلنگ کی روک تھام کے لئے ضلع بھر کے داخلی و خارجی راستوں پر چیکنگ کا سلسلہ جاری ہے اور چیکنگ کے سلسلہ میں ایس ایچ او سخی سرور آفتاب شبیر نے بلوچستان سے صوبہ پنجاب بین الصوبائی چیک پوسٹ پر نان کسٹم 12 کین ڈیزل، 3 گٹو نمک،3گٹو خشک دودھ،8 کارٹن سگریٹ اور 4 گٹو کپڑا سمگلنگ کی کوشش کو ناکام بنا دیا اورقانونی کارروائی کے بعد کسٹم حکام کے حوالہ کر دیا گیا ہے۔
اس حوالے سے انچارج چیک پوسٹ نے کہا ہے کہ نان کسٹم سامان سمگلنگ کرنے والوں کے خلاف آہنی ہاتھوں سے نمٹا جائے گااور نان کسٹم سامان سمگلنگ کرنے والوں کے ساتھ کسی بھی قسم کی کوئی رعایت نہیں برتی جائے گی۔
