گوجرانوالہ،22 اکتوبر( اے پی پی ) پچیس دسمبر کو گوجرانوالہ کا موٹروے کے ساتھ لنک ہوجائے گا،لاہور تک کا فاصلہ 45 منٹ سے کم رہ جائے گا،وزیر اعلیٰ پنجاب محسن نقوی نے گوجرانوالہ موٹروے لنک روڈ کو ٹریفک کے لیے کھولنے کی 25 دسمبر کی حتمی ڈیڈ لائن دے دی۔
انہوں نے لاہور،سیالکوٹ موٹروے کے ساتھ گوجرانوالہ کو لنک کرنے کے لئے زیر تعمیر دو رویہ سڑک کامعائنہ کیا اور ایف ڈبلیو او کے حکام کو تعمیراتی سرگرمیوں کو تیز کرنے کی ہدایت کی۔
انہوں نے پندرہ اعشاریہ دوکلومیٹر بے نظیر چوک سے واہنڈو تک کے پورے روٹ کا فضائی دورہ کیا اور جاری ترقیاتی کاموں کا جائزہ بھی لیا،ان کا مزید کہنا تھا کہ 7ارب 88کروڑ 70لاکھ روپے کی لاگت سے دو رویہ سڑک کی تعمیر پر تیزی سے کام جاری ہے۔
وزیراعلیٰ پنجاب کی زیر صدارت ایف ڈبلیو او کے کیمپ آفس میں اجلاس کے دوران ایف ڈبلیو او کے کرنل عمران نے منصوبہ پر ہونے والی پیشرفت کے بارے میں بریفنگ دی اور کہا کہ15.2کلومیٹر طویل اپرووچ روڈ کی تعمیر کے منصوبے پر مجموعی طور پر 57فیصد کام مکمل ہوچکا ہے، بے نظیر چوک سے واہنڈو انٹر چینج تک زیر تعمیر روڈ پر80 فیصد ارتھ ورک مکمل کرلیا گیاہے۔بریفنگ میں چیف سیکرٹری، انسپکٹر جنرل پولیس، ایف ڈبلیو او کے کرنل جمال، سیکرٹری تعمیرات و مواصلات، کمشنر گوجرانوالہ ڈویژن او رمتعلقہ حکام بھی اس موقع پر موجود تھے۔
