بہاولنگر،03نومبر(اے پی پی): ڈپٹی کمشنر ذوالفقار احمد بھون نے کہا ہے کہ ریونیو عوامی خدمت کچہری ریونیو ریکارڈ کی درستگی،فردانتقالات، رجسٹری،ڈومیسائل، انکم سرٹیفیکیٹ اور سائلین کے ریونیو سے متعلق دیگر مسائل حل کرنے میں بہت ممدومعاون ثابت ہورہی ہے۔
یہ بات انہوں نے ڈپٹی کمشنر آفس بہاول نگر میں منعقدہ ریونیو عوامی خدمت کچہری میں کہی جس میں ایڈیشنل ڈپٹی کمشنر ریونیو عبدالقیوم اور اسسٹنٹ کمشنر بہاول نگر متعلقہ افسران بھی موجود تھے۔ ڈپٹی کمشنر ذوالفقار احمد بھون نے کہا کہ حکومت نے ریونیوسسٹم کو بہتر بنانے اور جدید تقاضوں سے ہم آہنگ کرنے کے لئے متعدد اقدامات سے ڈیجیٹائزیشن کی منزل حاصل کی ہے جس کا براہ راست فائدہ عوام کو پہنچا ہے۔
ڈپٹی کمشنر نے ریونیو عوامی خدمت کچہری میں لوگوں کے ریونیو سے متعلق مسائل سنے اور درخواستیں بھی وصول کی گئیں اور انکے مسائل کے حل کے لئے موقع پر ہی احکامات جاری کئے گئے۔
ریونیو عوامی خدمت کچہری تمام تحصیلوں میں بھی منعقد کی گئیں جہاں متعلقہ اسسٹنٹ کمشنرز نے عوام الناس کے ریونیو سے متعلق مسائل حل کئے ۔
