لاہور،2نومبر (اے پی پی):نگران صوبائی وزیر صحت پروفیسر ڈاکٹرجاویداکرم نے کہا ہے کہ میڈیکل ایجوکیشن کسی بھی ملک کے نظام صحت میں ریڑھ کی ہڈی کی حیثیت رکھتی ہے۔
انہوں نے ان خیالات کا اظہار جمعرات کو یونیورسٹی آف لاہور کی ہیلتھ پروفیشنلز ایجوکیشن میں بطور مہمان اعزاز خطاب کرتے ہوئے کیا۔انہوں نے کہا کہ میڈیکل ایجوکیشن پرانے دور میں صرف ایک مضمون کے طور پر پڑھائی جاتی تھی لیکن دور حاضر میں میڈیکل ایجوکیشن کو حقیقی مقام حاصل ہوا ہے۔انہوں نے کہاکہ ایسی آگاہی کانفرنسز سے ہمیں بہت کچھ سیکھنے کا موقع ملتا ہے،ہمیں میڈیکل ایجوکیشن کی اہمیت کو اجاگر کرنے کیلئے ایک پلیٹ فارم بنانا ہوگا۔
کانفرنس کے دوران نگران صوبائی وزیر صحت اور پنجاب کی تمام طبی درسگاہوں کے وائس چانسلرز کو بہترین خدمات پر خراج تحسین پیش کیا گیا۔
اس موقع پر وائس چانسلر فاطمہ جناح میڈیکل یونیورسٹی پروفیسر ڈاکٹر خالد مسعود گوندل، وائس چانسلر کنگ ایڈورڈ میڈیکل یونیورسٹی پروفیسر ڈاکٹر محمود ایاز، وائس چانسلر یونیورسٹی آف چائلڈ ہیلتھ سائنسز پروفیسر ڈاکٹر مسعود صادق، وائس چانسلر یونیورسٹی آف ہیلتھ سائنسز پروفیسر ڈاکٹر احسن وحید راٹھور، وائس چانسلر راولپنڈی میڈیکل یونیورسٹی پروفیسر ڈاکٹر عمر، وائس چانسلر نشتر میڈیکل یونیورسٹی پروفیسر ڈاکٹر رانا الطاف سمیت طلبا و طالبات کی کثیر تعداد نے بھی شرکت کی۔
