اسلام آباد،6نومبر (اے پی پی):نگران وفاقی وزیر برائے وفاقی تعلیم و پیشہ وارانہ تربیت مدد علی سندھی سے سعودی عرب کی امام محمد بن سعود اسلامی یونیورسٹی کے صدر ڈاکٹر احمد بن سالم العامری نے پیر کو یہاں ملاقات کی۔ وفاقی وزیر مدد علی سندھی نے وفد کا پرتپاک استقبال کیا۔
وفاقی وزیر نے امام محمد بن سعود اسلامی یونیورسٹی کی تعریف کرتے ہوئے کہا کہ یہ ایک تاریخی اور پر وقار ادارہ ہے۔ وفاقی وزیر تعلیم نے کہا کہ انہوں نے وزیر تعلیم کا عہدہ سنبھالنے کے بعد سب سے پہلے تعلیم کے معیار، سکول سے باہر بچوں کی تعداد میں کمی اور سیرت النبی ﷺ پر تحقیق کو ترجیح دی ہے۔ انہوں نے کے ایس اے کو قائداعظم یونیورسٹی میں 15 ریسرچ فیلوشپس کی پیشکش بھی کی۔
نگران وفاقی وزیر برائے وفاقی تعلیم و پیشہ وارانہ تربیت مدد علی سندھی نے کہا کہ ڈاکٹر ہتھل حمود علطیبی کا کام اور کوششیں مثالی ہیں۔ وفاقی وزیر نے آئی آئی یو آئی میں سسٹمز کی اپ گریڈیشن کی تعریف کی۔ انہوں نے کہا کہ آئی آئی یو آئی میں تعلیم کا معیار ڈاکٹر ہتھل حمود علطیبی کی قیادت میں مسلسل بلند ہو رہا ہے۔انہوں نے سیرت النبی ﷺ پر تحقیق کا دائرہ بڑھانے کی ضرورت پر زور دیا۔ انہوں نے کہا کہ کے ایس اے اور پاکستان کی یونیورسٹیوں کے درمیان شریعت، عدلیہ کے کردار، اسلامی قانون اور نبی اکرم ﷺ کی سیاسی تعلیمات کے حوالے سے تحقیق کے دائرہ کار کو بڑھانے اور وسیع کرنے کے لئے فوری کام ہونا چاہئے۔انہوں نے کہا کہ سیرت النبی ﷺ کے سیاسی پہلو کو مناسب اہمیت نہیں دی گئی جو کہ اب دی جائے گی۔
وفاقی وزیر مدد علی سندھی اور ریاض کی امام محمد بن سعود اسلامی یونیورسٹی کے صدر ڈاکٹر احمد بن سالم العامری نے سیرت النبی ﷺ پر تحقیق کرنے کے لئے یونیورسٹی کی سطح پر اساتذہ کے تبادلے شروع کرنے پر اتفاق کیا۔
ریاض کی امام محمد بن سعود اسلامی یونیورسٹی کے صدر ایچ ای ڈاکٹر احمد بن سالم العامری نے کہا کہ ہم نے پاکستانی طلباء کو 700 وظائف کی پیشکش کی ہے اور ہم اس تعداد کو پاکستان کی وزارت تعلیم کی خواہش کے مطابق بڑھانے کا ارادہ رکھتے ہیں۔وفاقی وزیر تعلیم نے مدارس کے مذہبی رہنماؤں کو تربیت دینے کی ضرورت پر بھی روشنی ڈالی۔ انہوں نے کہا کہ ہمیں اپنے مذہبی رہنماؤں کو روشناس کرانے کی ضرورت ہے اور مملکت سعودی عرب پاکستان میں مدارس کے علماء کو تربیت دے کر مدد کر سکتی ہے۔
وفاقی وزیر نے پاکستانی عوام کے لئے عربی زبان کے کورسز بنانے کی ضرورت پر بھی روشنی ڈالی۔ ریاض کی امام محمد بن سعود اسلامی یونیورسٹی کے صدر ایچ ای ڈاکٹر احمد بن سالم العامری نے کہا کہ کے ایس اے میں عربی زبان کے بہترین ادارے ہیں جو فاصلاتی تعلیم یا اساتذہ کے تبادلے کے ذریعے اپنے پروگراموں کو پاکستان کی یونیورسٹیوں تک بڑھا سکتے ہیں۔
