لاہور،21نومبر (اے پی پی):وزیراعلیٰ پنجاب محسن نقوی نے پنجاب انسٹی ٹیوٹ آف کارڈیالوجی کا دورہ کیا اورپی آئی سی کی اپ گریڈیشن پراجیکٹ پر پیشرفت کا جائزہ لیا۔ وزیراعلی نے ایمرجنسی بلاک کے توسیعی منصوبےپر جاری تعمیراتی سرگرمیوں کا معائنہ کیا۔ انہوں نے کہا کہ اپ گریڈیشن کے بعد ایمرجنسی کے بیڈز میں اضافہ ہوگا،مریضوں اور تیمارداروں کی سہولت کے لئے ایل ای ڈی سکرینیں لگائی جائیں گی۔
وزیراعلی ٰمحسن نقوی نے آکسیجن کے کنکشن اوپن نہ رکھنے کی ہدایت کی،ہسپتال کے تینوں فلورکا معائنہ کیا اور زیر تعمیر پرائیویٹ وارڈ اور کمروں میں جاری تعمیراتی کاموں کا مشاہدہ کیا۔ وزیراعلی ٰنے پرائیویٹ کمروں کو مزید کشادہ کرنے کا حکم دیا اورہدایت کی کہ 3 شفٹ میں کام اور اپ گریڈیشن پراجیکٹ کومقررہ مدت میں مکمل کیا جائے۔
محسن نقوی نے وارڈ میں مریضوں کی عیادت کی اوران سے خیریت پوچھی،مریض کے تیماردار کی کنٹین پر اوور چارجنگ کی شکایت کا فوری نوٹس لیتے ہوئے اے سی ماڈل ٹائون کو اوور چارجنگ کی شکایت پر فوری کارروائی کا حکم دیا۔ وزیراعلی نے مریضوں اور تیمارداروں سے بات چیت کی اوران کے مسائل سنے،نوجوان کی طرف سے ہسپتال میں ناروا سلوک اورپیسے لے کر داخل ہونے کی شکایت پر فوری کارروائی کی ہدایت کی۔
صوبائی وزیر سپیشلائزڈ ہیلتھ کیئر اینڈ میڈیکل ایجوکیشن ڈاکٹر جاوید اکرم، سیکرٹری صحت،سیکرٹری تعمیرات و مواصلات، کمشنر، سپیشل سیکرٹری ہیلتھ، چیف ایگزیکٹو آفیسر پی آئی سی ڈاکٹر انجم جلال، ایم ایس ڈاکٹر تحسین اورمتعلقہ حکام بھی اس موقع پر موجود تھے۔
