پشاور،20 نومبر(اے پی پی): گورنر ہاؤس پشاور میں نگران صوبائی وزیر بیرسٹر فیروز جمال شاہ کاکا خیل کی تقریب حلف برداری منعقد ہوئی، جسمیں نگران صوبائی کابینہ کے 10ویں رکن بیرسٹر فیروز جمال شاہ کاکا خیل نے بحیثیت صوبائی وزیر اپنے عہدے کاحلف اٹھا لیا۔
گورنر خیبرپختونخوا حاجی غلام علی نے نگران صوبائی وزیر بیرسٹر فیروز جمال شاہ کاکا خیل سے ان کے عہدے کا حلف لیا، جبکہ نگران وزیراعلٰی جسٹس (ر) سید ارشد حسین شاہ بھی تقریب حلف برداری میں شریک تھے۔
گورنر خیبرپختونخوا حاجی غلام علی نے نگران صوبائی وزیر بیرسٹر فیروز جمال شاہ کاکا خیل کو مبارکباد دیتے ہوئے نیک تمناؤں کا اظہار کیا۔
تقریب میں نگران صوبائی وزراء، چیف سیکرٹری ندیم اسلم چوہدری، انتظامی محکموں کے سربراہان سمیت سیاسی وسماجی شخصیات نے شرکت کی۔تقریب میں سابق نگران وزیراعلٰی محمداعظم خان مرحوم کیلئے مغفرت و درجات بلندی کی دعا بھی کی گئی۔
