اسلام آباد،15نومبر(اے پی پی ):چیف الیکشن کمشنر سکندر سلطان راجہ سے نگران وزیرِ اعلیٰ خیبر پختونخواہ جسٹس ریٹائرڈ سید ارشد حسین شاہ نے بدھ کو یہاں الیکشن کمیشن سیکرٹریٹ میں ملاقات کی ہے۔ نگران وزیرِ اعلیٰ نے چیف الیکشن کمشنر کو صوبے میں انتخابات کی تیاریوں پر بریفنگ دی اور یقین دہانی کرائی کہ خیبر پختونخواہ کی صوبائی حکومت الیکشن کمیشن کے ساتھ مل کر صوبے میں آزادانہ، منصفانہ اور غیر جانبدارانہ انتخابات کا انعقاد یقینی بنائےگی۔
چیف الیکشن کمشنر نے نگران وزیرِ اعلیٰ کو عہدہ سنبھالنے پر مبارک باد دی اور بتایا کہ صوبہ خیبر پختونخواہ میں موجودہ سیکیورٹی کی صورتِ حال کو مدنظر رکھتے ہوئے عام انتخابات کے پر امن انعقاد کے لیے ضروری اقدامات کیے جائیں جس میں ووٹرز کے تحفظ کو اولین فوقیت دی جائے۔
سکندرسلطان راجہ نے نگران وزیرِ اعلیٰ کو بتایا کہ خیبر پختونخواہ میں انتخابات کی تیاریوں کا جائزہ لینے کے لیے جلد ہی الیکشن کمیشن صوبے کا دورہ کرے گا جس میں تمام تیاریوں کو بغور دیکھا جائےگا۔
