ملتان ،20 نومبر(اے پی پی ):ڈپٹی کمشنر کیپٹن ریٹائرڈ رضوان قدیر نے گزشتہ روز ڈسٹرکٹ ہیڈ کوارٹر ہسپتال کی نئی بلڈنگ کا دورہ کیا اس موقع پر ڈپٹی کمشنر نے کڈنی سنٹر سے ملحقہ ڈی ایچ کیو ہسپتال میں طبی سہولیات کا جائزہ لیا۔سی ای او ہیلتھ ڈاکٹر فیصل قیصرانی نے طبی سہولیات پر تفصیلی بریفننگ دی۔ڈپٹی کمشنر نے مریضوں سے ملاقات کی اور نئے آپریشن تھیٹرز کا معائنہ بھی کیا۔ڈپٹی کمشنر کیپٹن ریٹائرڈ رضوان قدیر نے کہا کہ ڈی ایچ کیو فعال ہونے سے شہباز شریف ہسپتال پر مریضوں کا بوجھ کم ہوگا جبکہ ڈی ایچ کیو ہسپتال کو ایک ماہ میں مکمل آپریشنل کرکے مریضوں کو ریلیف دینگے۔ڈپٹی کمشنر نے بتایا کہ محکمہ بلڈنگ کو ہنگامی بنیادوں پر آپریشن تھیٹرز اور وارڈز مکمل کرنے کی ہدایت کی ہے جبکہ نئے ڈی ایچ کیو میں ڈاکٹرز اور پیرا میڈیکل سٹاف کو مکمل سہولیات فراہم کی جائیں گی۔قبل ازیں ڈپٹی کمشنر سے پاکستان میڈیکل ایسوسی ایشن کے وفد نے ملاقات کی اور ڈی ایچ کیو کے حوالے سے مطالبات پیش کئےڈپٹی کمشنر کیپٹن ریٹائرڈ رضوان قدیر نے محکمہ صحت کو ڈاکٹرز اور پیرا میڈیکل سٹاف کے مسائل فوری حل کرنے کی ہدایت بھی کی۔
