لاہور22نومبر،( اے پی پی ): وزیراعلیٰ پنجاب محسن نقوی نے لبرٹی میں پولیس خدمت مرکز کا اچانک دورہ کیا۔ پولیس خدمت مرکز میں شہریوں کا بے پناہ رش تھا اوردرخواست گزاروں نے کاررؤائی میں تاخیر کی شکایات کیں۔ بعض شہریوں نے 4،4 گھنٹے انتظارکرانے کی شکایات کیں۔ وزیراعلیٰ محسن نقوی نے خدمت مرکز میں رش اور شہریوں کو انتظار کرانے کی شکایات پر برہمی کااظہار کیا اور فوری طورپرسی ٹی او کو خدمت مرکز میں طلب کرلیا۔ وزیر اعلیٰ محسن نقوی نے انسپکٹرجنرل پولیس کو فون کیا اور پولیس خدمت مرکز کو 24گھنٹے آپریشنل رکھنے کی ہدایت کی۔ وزیراعلیٰ محسن نقوی نے ہدایت کی کہ کاؤنٹرز پر عملے کی تعداد میں اضافہ کیا جائے اور شہریوں کے کام کو جلد نمٹایا جائے تاکہ انہیں بلاجواز انتظار کی زحمت نہ کرنی پڑے۔ وزیر اعلیٰ محسن نقوی نے گارڈن ٹاؤن میں قائم پولیس خدمت مرکز کو بھی 24گھنٹے کھلا رکھنے کا حکم دیا۔ وزیر اعلیٰ محسن نقوی نے خدمت مرکز میں آئے لوگوں سے ملاقات کی اور خدمت مرکز میں درخواستوں پر کارروائی کا جائزہ لیا۔وزیر اعلی محسن نقوی نے تحفظ مرکز، میثاق مرکز، ویٹنگ روم اور کاونٹرز کا بھی معائنہ کیا۔وزیر اعلیٰ محسن نقوی نے عملے کو شہریوں کی درخواستوں پر جلد کارروائی نمٹانے کی ہدایت کی۔
