کراچی ،8 نومبر( اے پی پی ): پاکستان اوپن ٹین پن باﺅلنگ چیمپئن شپ شروع ہوگئی۔چیمپئن شپ میں اعجاز الرحمٰن اپنے ٹائٹل کا دفاع کریں گے ، چیمپئن شپ کا افتتاح پاکستان ٹین پن باﺅلنگ فیڈریشن کے صدر اعجاز الرحمٰن نے کیا۔ افتتاحی تقریب میں پاکستان ٹین پن باﺅلنگ فیڈریشن کے سینئر نائب صدر خواجہ احمد مستقیم اور سندھ ٹین پن باﺅلنگ ایسوسی ایشن کے صدر علیم آغا کے علاوہ شائقین کی کثیر تعداد بھی موجود تھی۔
چیمپئن شپ کا ڈیف مینز ایونٹ ناصر ڈار نے جیت لیاجبکہ فہد اور احمد خان نے بالترتیب دوسری اور تیسری پوزیشن حاصل کی، انوشہ انیل نے ڈیف ویمنز ایونٹ میں پہلی پوزیشن حاصل کی جبکہ ارم اور بینش منیر نے دوسری اور تیسری پوزیشن حاصل کی۔
میڈیا ایونٹ میں شاہد انصاری نے کامیابی حاصل کی جبکہ سبط حسن اور جاوید اقبال نے بالترتیب دوسری اور تیسری پوزیشن حاصل کی، اس سپورٹس ایونٹ میں ملک بھر سے دو سو سے زائد کھلاڑی نو مختلف کیٹگریز کے مقابلوں میں حصہ لے رہے ہیں۔ کیٹیگریز میں اوپن سنگلز، ایمچیور، لیڈیز، انڈر 22، سینئر، میڈیا، ڈبلز، ڈیف اور مکس ٹیم کے مقابلے شامل ہیں۔
یہ سپورٹس ایونٹ 12 نومبر تک جاری رہے گا ، پاکستان ٹین پن باﺅلنگ فیڈریشن کے صدر اعجاز الرحمان کا کہنا ہے کہ پاکستان اوپن ٹین پن باﺅلنگ چیمپئن شپ 2023 ءہمارے ملک کی باﺅلنگ کمیونٹی کے لیے ایک دلچسپ ایونٹ ہے ،یہ ایونٹ ہر سطح کے باولرز کو اپنی صلاحیتوں کا مظاہرہ کرنے اور پاکستان بھر کے باصلاحیت کھلاڑیوں کو باہمی مقابلے کرنے کے لیے ایک پلیٹ فارم مہیا کرتا ہے،انہوں نے مزید کہا کہ اس طرح کے ٹورنامنٹ ہمارے ملک میں کھیلوں کی ترقی کے لیے بہت اہمیت کے حامل ہیں جن سے مستقبل میں کھلیوں کو فروغ ملے گا علاوہ ازیں یہ ٹورنامنٹس نوجوان ٹیلنٹ کو باﺅلنگ کے کیریئر میں آگے بڑھائیں گے اور کامیابیوں کی طرف راغب کریں گے ۔
