لاہور، 20 دسمبر ( اے پی پی ): پاکستانی کرکٹ ٹیم کے سٹار آل راونڈر شاداب خان پنجاب پولیس کا حصہ بن گئے،قومی کرکٹر شاداب خان نے سنٹرل پولیس آفس میں آئی جی پنجاب ڈاکٹر عثمان انور سے ملاقات کی،پنجاب پولیس نے نامور کرکٹر شاداب خان کو اپنا برینڈ ایمبیسڈر مقرر کر دیا۔
ترجمان پنجاب پولیس کے مطابق کرکٹر شاداب خان نے پنجاب پولیس کا یونیفارم زیب تن کیا۔ آئی جی پنجاب ڈاکٹر عثمان انور اور ایڈیشنل آئی جی پنجاب سلطان احمد چوہدری نے شاداب خان کو اعزازی ڈی ایس پی کے رینک لگائے گئے،سٹارکرکٹر شاداب خان نے اعزازی ڈی ایس پی مقرر کرنے پر آئی جی پنجاب کو سلیوٹ کیا، پنجاب پولیس کی نمائندگی دینے پر شکریہ ادا کیا اور کہا کہ آئی جی پنجاب کی طرف سے برینڈ ایمبیسڈر مقرر کیا جانا میرے لئے باعث اعزاز ہے،پنجاب پولیس کے ساتھ منسلک ہو کر اپنا کردار بھرپور طریقے سے ادا کرنے کی کوشش کروں گا۔
انہوں نے کہا کہ بوقت ضرورت پنجاب پولیس کیلئے ہمیشہ دستیاب ہونگا کبھی سوچا نہیں تھا کہ پنجاب پولیس کا حصہ بنوں گا۔
ایڈیشنل آئی جی پنجاب سلطان احمد چوہدری نے شاداب خان کو سنٹرل پولیس آفس کے مختلف حصوں کا وزٹ کروایا۔ شاداب خان کو پنجاب پولیس کی ورکنگ اور مختلف شعبوں بارے آگاہی دی گئی۔
