لاہور،11دسمبر (اے پی پی):وزیر اعلیٰ پنجاب محسن نقوی کی زیرصدارت وزیر اعلیٰ آفس میں پنجاب کابینہ کا 34 واں اجلاس منعقد ہوا۔اجلاس میں چنگ چی رکشہ کو قانونی حیثیت دینے کے لئے موٹر وہیکلز رولز 1969 میں ترامیم کی منظوری دی گئی۔
اجلاس میں فیصلہ کیا گیا کہ چنگ چی / موٹر سائیکل رکشہ کو تھری ویلر کے طورپر رجسٹر کیا جائے گا اور موجودہ موٹرسائیکل رکشہ کی عارضی رجسٹریشن کے لئے ریجنل ٹرانسپورٹ اتھارٹی کو سپیشل رجسٹریشن اتھارٹی کا درجہ دیا جائے گا۔عارضی رجسٹریشن کے بعد موٹر سائیکل رکشے کو وضع کردہ سائز اور ڈیزائن کے مطابق تبدیلی کے لئے 4 ماہ دئیے جائیں گے۔4 ماہ کے بعد موٹرسائیکل رکشہ فٹنس سر ٹیفکیٹ ملنے کے بعد ایکسائز سے رجسٹریشن نمبر حاصل کرسکے گا۔وزیر اعلیٰ محسن نقوی نے موٹرسائیکل رکشے کی رجسٹریشن کا عمل آسان اور فارم اردو میں تیار کرنے کی ہدایت کی۔
صوبائی وزرا، مشیران،ایڈیشنل چیف سیکرٹری، انسپکٹر جنرل پولیس،ایڈووکیٹ جنرل پنجاب،سینئر ممبر بورڈ آف ریونیو، چیئرمین پلاننگ اینڈ ڈویلپمنٹ، متعلقہ محکموں کے سیکرٹریز اور اعلیٰ حکام نے اجلاس میں شرکت کی۔
