اسلام آباد ، 01جنوری(اے پی پی):عام انتخابات کیلئے امیدواروں کی طرف سے جمع کرائے گئے کاغذات نامزدگی کی جانچ پڑتال کا عمل مکمل ہونے کے بعد کاغذات نامزدگی منظور یا مسترد ہونے کے خلاف اپیلیں آج بروز پیر سے وصول کی جارہی ہیں۔
آئندہ عام انتخابات 2024 کے لئے ریٹرننگ افسران کی جانب سے امیدواروں کے کاغذات نامزدگی منظور یا مسترد کئے جانے کے خلاف اپیلیں 3 جنوری تک دائر کی جاسکیں گی جن پر فیصلوں کے لئے 24 اپیلٹ ٹربیونلز قائم کردیئے گئے ہیں جو 10 جنوری تک ان اپیلوں کو نمٹائیں گے۔جنرل نشستوں پر امیدواروں کی نظر ثانی شدہ فہرست 11 جنوری کو شائع کی جائے گی اورکاغذات نامزدگی 12 جنوری کو واپس لئے جاسکیں گے جبکہ امیدواروں کو انتخابی نشانات کی الاٹمنٹ 13 جنوری کو ہوگی۔
خواتین اور اقلیتوں کی مخصوص نشستوں پر جمع کرائے گئے کاغذات نامزدگی کی جانچ پڑتال 13 جنوری تک ہوگی،ریٹرننگ افسران کی جانب سے کاغذات نامزدگی منظور یا مسترد کئے جانے کے خلاف اپیلیں 16 جنوری تک جبکہ اپیلیٹ ٹربیونل کی جانب سے ان اپیلوں پر فیصلہ19 جنوری کو ہوگا۔امیدواروں کی نظرثانی شدہ فہرست 20 جنوری کو جبکہ کاغذات نامزدگی 22 جنوری کو واپس لئے جاسکیں گے۔ جس کے بعد امیدواروں کی فہرست 23 جنوری کو جاری کی جائے گی۔عام انتخابات کیلئے آٹھ فروری کو ووٹ ڈالے جائیں گے۔
