لاہور،16 جنوری (اے پی پی ): قذافی سٹیڈیم لاہور میں تیرہ جنوری سے شروع ہونے والا چار روزہ خواتین امپائرز انڈکشن کورس آج اپنے اختتام کو پہنچ گیا ہے ۔ پاکستان ویمنز کرکٹ ٹیم کی کپتان ندا ڈار اور سابق انٹرنیشنل کرکٹر سخن فیض ان تیرہ شرکاءمیں شامل تھیں جنہوں نے خواتین امپائرز انڈکشن کورس میں حصہ لیا ۔
چار روزہ کورس میں خواتین شرکاءنے کھیل کے قوانین کی معلومات سمیت بنیادی تربیتی سیشنز میں شرکت کی۔ کورس کے آخری روز شرکاءنے تحریری امتحان دیا اور ان کے ون آن ون انٹرویوز ہوئے۔انٹرنیشنل کرکٹ کونسل (آئی سی سی) کے ایلیٹ پینل آف امپائرز کے ممبر احسن رضا اور پی سی بی کے انٹرنیشنل امپائر آصف یعقوب اس کورس کے انسٹرکٹر تھے۔
اس موقع پر قومی ویمنز کرکٹ ٹیم کی کپتان ندا ڈار نے کہا کہ یہ بہت اہم کورس تھا جس کے باعث مجھے کھیل کے قوانین کو زیادہ باریک بینی سے سمجھنے میں مددملی۔ انہوں نے مزید کہا کہ میں نوجوان لڑکیوں کے لیے رول ماڈل بننا چاہتی تھی اور انہیں امپائرنگ کے میدان میں آنے کی ترغیب دینا چاہتی تھی،کورس میں ایلیٹ پینل کے امپائرز کے اشتراک سے تجربات بہت قیمتی تھے اور مستقبل میں ہم سب کے لیے مددگار ثابت ہونگے۔
احسن رضا نے کہا کہ چار روزہ کورس میں بطور انسٹرکٹرز ہم نے آج کے دور میں پلیئنگ کنڈیشنز، قوانین اور پریکٹیکل امپائرنگ پر تبادلہ خیال کیا، ہم نے گراونڈ میں انٹریکٹو پریکٹیکل سیشنز کا اہتمام کیا اور شرکاءکو ویڈیو کلپس کے ذریعے امپائرنگ سے متعلق معلومات فراہم کی گئیں۔
کورس کی شرکاءمیں عمارہ خان، عائشہ فاروق، عائشہ شکور، فاخرہ کاظمی، اسما، ندا ڈار، قراة العین، ثانیہ اشرف، شمائلہ ناز، سخن فیض، سمیرا ساجد، ذ کیہ گل اور زبیدہ ستارشامل تھیں۔
