راولپنڈی،18جنوری(اے پی پی): نیشنل ویمنز ٹی ٹوئنٹی ٹورنامنٹ میں جمعرات کے روز کھیلے گئے میچوں میں لاہور، کراچی اور راولپنڈی کی ٹیموں نے کامیابی حاصل کرلی ہے۔
شعیب اختر کرکٹ اسٹیڈیم راولپنڈی میں لاہور نے پشاور کو 147 رنز سے ہرایا۔لاہور نے پہلے بیٹنگ کرتے ہوئے بغیر کسی نقصان کے 233 رنز بنائے۔
صدف شمس اور سدرہ امین نے ڈبل سنچری پارٹنرشپ قائم کرتے ہوئے سنچریاں بھی اسکور کیں۔ سدرہ امین نے 12چوکوں اور 6چھکوں کی مدد سے 113 رنز بنائے اور ناٹ آؤٹ رہیں۔ صدف شمس نے بھی آؤٹ ہوئے بغیر 106 رنز اسکور کیے جس میں 15 چوکے اور 2 چھکے شامل تھے۔
جواب میں پشاور کی ٹیم 4 وکٹوں کے نقصان پر 86 رنز بناسکی۔ راحیمہ سید 28 رنز ناٹ آؤٹ کے ساتھ ٹاپ اسکورر رہیں۔
صدف شمس اور سدرہ امین مشترکہ طور پر پلیئرآف دی میچ قرار پائیں۔
