لاہور، 17 جنوری ( اے پی پی):نگران صوبائی وزیر صحت پروفیسر ڈاکٹر جاوید اکرم نے کہا ہے کہ وزیر اعلیٰ پنجاب سید محسن نقوی کے ویژن کے مطابق عوام تک صحت کی بہتر سہولیات فراہم کرنے کیلئے کوشاں ہیں، ہم ڈاکٹرز لوگوں کے دکھوں کے ساتھی ہیں ،ہسپتال میں ایک ماں کی موت سے ہمارے جسم کا ایک حصہ بھی مرتا ہے۔
ان خیالات کا اظہار انہوں نے مقامی ہوٹل میں آؤٹ سٹینڈنگ کیمبرج لرنر ایوارڈز پاکستان کی تقریب سے خطاب کرتے ہوئے کیا۔اس موقع پر کنٹری ڈائریکٹر پاکستان عظمی یوسف، تابندہ مظہر، کنٹری ایگزیمز ڈائریکٹر امینڈا انگرام، ڈاکٹر اکرام، زین مصطفیٰ، طلباء و طالبات اور والدین کی کثیر تعداد نے شرکت کی۔نگران صوبائی وزیر صحت پروفیسر ڈاکٹر جاوید اکرم نے اس موقع پر نمایاں بچوں میں تعریفی اسناد بھی تقسیم کیں۔
پروفیسر ڈاکٹر جاوید اکرم نے اس موقع پر خطاب کرتے ہوئے کہا کہ زندگی ہمیشہ انسان کو سیکھاتی ہے۔ میں اپنے والدین کے بغیر ایک سانس لینے کے قابل بھی نہیں تھا۔ہر بچے کو کامیابی پر اپنے والدین کو خراج عقیدت پیش کرنا چاہئے۔ انہوں نے کہا کہ اپنے ملک سے محبت ہی کامیابیوں کی بلندی تک پنہچاتی ہے۔ قرآن مجید میں علم کے حصول کی خاطر چین جانے پر بھی زور دیا گیا ہے۔ ہمارا ایک دوسرے پر انحصار کرنا اللہ پاک کی بہت بڑی نعمت ہے،ہم پاکستان میں رشتوں پر انویسٹمنٹ کرتے ہیں آج یہاں بچوں کو کامیاب ہونے کا موقع دیا جا رہا ہے۔
پروفیسر ڈاکٹر جاوید اکرم نے کہا ہے کہ کامیاب ہونے کیلئے ہمیں خواب دیکھنے چاہئیں الحمدللہ میرے ایک ہزار سے زائد امپیکٹ فیکٹرز ہیں۔یونیورسٹی آف کیمبرج کے بچے پوری دنیا میں پاکستان کا نام روشن کریں گے۔
