لاہور15جنوری: ( اے پی پی )نگران وزیر اعلی پنجاب محسن نقوی صوبائی کابینہ کے ہمراہ گوجرانوالہ پہنچ گئے صوبائی وزراء کے ہمراہ کوچ میں سفر کیا اور لاہور سیالکوٹ موٹروے لنک روڈ گوجرانوالہ ایکسپریس وے پراجیکٹ کا دورہ کیا، پراجیکٹ کا تفصیلی معائنہ کیا اور تعمیراتی سرگرمیوں کا مشاہدہ کیا اور کہا کہ 13 جنوری تک لاہور سیالکوٹ موٹروے لنک روڈ گوجرانوالہ کو ٹریفک کے لیے کھول دیا جائے گا ۔وزیر اعلی محسن نقوی نے اسفالٹ کے کام کا جائزہ لیا اور اعلی معیار کے ساتھ اسفالٹ کے کام کو مکمل کرنے کی ہدایت کی اور کہا کہ منصوبے کے اطراف پودے اور لینڈ سکیپنگ کا کام بھی فوری شروع کیا جائے۔انہوں نے کہا کہ گوجرانوالہ ایکسپریس وے جدید سفری سہولیات کے حوالے سے اہم سنگ میل ثابت ہوگا۔گوجرانوالہ سے لاہور کا سفر 45 منٹ میں طے ہو سکے گا۔ہزاروں مسافروں کو آرام دہ سفر کی سہولت حاصل ہو جائے گی۔محسن نقوی کو بریفنگ میں بتایا گیا کہ پراجیکٹ کا مجموعی طور پر 85فیصد کام مکمل ہو چکا ہے۔ ایف ڈبلیو او کے حکام نے وزیر اعلیٰ کو پراجیکٹ پر ہونے والی پیشرفت کے بارے میں بریفنگ دی۔صوبائی وزراء ایس ایم تنویر، منصور قادر،عامر میر۔ بلال افضل ،مشیر وہاب ریاض،چیف سیکرٹری، انسپکٹر جنرل پولیس،سیکرٹری تعمیرات و مواصلات، کمشنر گوجرانوالہ، آر پی او،سی پی او گوجرانوالہ،ڈپٹی کمشنر گوجرانوالہ، ایف ڈبلیو او حکام اور دیگر حکام بھی اس موقع پر موجود تھے۔
