لاہور27مارچ:( اے پی پی ) سینئر وزیر پنجاب مریم اورنگزیب نے کہا ہے کہ وزیراعلیٰ پنجاب مریم نوازشریف نے بیرونی امداد سے چلنے والے ترقیاتی منصوبوں کی سخت مانیٹرنگ اور بروقت تکمیل کی ہدایت کی ہے فارن فنڈڈ منصوبوں کے معیار، رفتار اور شفافیت کا ہر تین ماہ بعد جائزہ لیا جائے گا ۔
ان خیالات کا اظہارانہوں نےپلاننگ اینڈ ڈویلپمنٹ بورڈ میں اجلاس کی صدارت کرتے ہوئے کیا ۔انہوں نے کہا کہ بنیادی مراکز صحت میں ایمرجنسی دیکھ بھال، ای سی جی کی فراہمی سمیت دیگر سہولیات کی فراہمی یقینی بنانے کی بھی ہدایت کی گئی ہے درست اعدادوشمار کی فراہمی کے لئے سوشل اکنامک رجسٹری کے قیام پر عمل درآمد کیا جائے گا ۔
اجلاس میں وزیراعلیٰ پنجاب مریم نواز شریف کی ہدایت پربیرونی مالی اعانت سے چلنے والے منصوبوں کی موجودہ صورتحال کا تفصیلی جائزہ لیاگیا ۔
اجلاس سے خطاب کرتے ہوئے سنئیر صوبائی وزیر نے کہا کہ مریم نواز شریف ورلڈ بنک، اے ڈی بی اور عطیات دینے والے دیگر اداروں سے باہمی تعاون کومزید بہتر اور وسیع کرنے کی خواہش مند ہیں، عالمی بینک کے مالی تعاون سے 11 اور ایشیائی ترقیاتی بینک کے تعاون سے پنجاب میں 8 ترقیاتی منصوبے جاری ہیں۔
اجلاس میں صوبائی وزیر اطلاعات عظمیٰ بخاری ، وفاقی سیکرٹری ڈاکٹر کاظم نیاز اور چیرمین پی اینڈ ڈی بورڈ نبیل احمد اعوان نے شرکت کی۔
