اسلام آباد،15 مارچ (اے پی پی ): وزیراعظم کی ہدایت پر ایف بی آر اور کارنداز پاکستان کے درمیان ٹیکس سسٹم کی ڈیجیٹائزیشن کے لئے معاہدہ پر دستخط ہوگئے ، اس حوالے سے تقریب کا اہتمام کیا گیا ، تقریب میں چیئرمین ایف بی آر ملک امجد زبیر ٹوانہ اوروزارت خزانہ کے اعلیٰ افسران نے شرکت کی۔
ایف بی آر کی جانب سے بتایا گیا کہ کارندازپاکستان ایف بی آر کے ٹیکس سسٹم کی ڈیجیٹائزیشن میں معاونت کرے گا۔ ڈیجیٹائزیشن سے ٹیکس دہندگان کے اخراجات کو کم کرنے میں مدد ملے گی۔ معاہدہ سے معیشت کی ڈیجیٹائزیشن، ٹیکس نیٹ کو وسیع کرنے اور محصولات میں پائیدار اضافہ کیا جا سکے گا۔
چیئرمین ایف بی آر ملک امجد زبیر ٹوانہ نے کہا کہ ایف بی آر اپنے سسٹم کو خودکار بنانے اور معیشت کو ڈیجیٹائز کرنے پر بھر پور توجہ دے رہا ہے۔غیر دستاویزی معیشت کے چیلنج سے نمٹنے اور ٹیکس کی بنیاد کو وسیع کرنے کے لئے ٹھوس کوششیں کی جارہی ہیں۔انہوں نے کہا کہ ایف بی آر کارنداز پاکستان کے ساتھ ایف بی آر کی ڈیجیٹل تبدیلی اور ڈیجیٹائزیشن کے اقدامات کے نفاذ کے لئے مل کرکام کرے گا۔ ڈیجیٹائزیشن سے ایف بی آر کی کارکردگی میں مزید بہتر ی آئے گی۔
