لاہور,18مارچ:( اے پی پی ) :وزیر اعلیٰ پنجاب مریم نواز شریف اور قائد مسلم لیگ ن محمد نواز شریف کی زیرِ صدارت ٹرانسپورٹ سیکٹر کے پراجیکٹ کا جائزہ اجلاس منعقد ہوا۔اجلاس میں لاہور میں انڈر گراؤنڈ ٹرین پراجیکٹ کا پلان طلب ،پنجاب کے تین شہروں میں میٹرو بس پراجیکٹ کا اصولی فیصلہ کیا گیا۔قائد مسلم لیگ ن محمد نواز شریف نے اجلاس سے خطاب کرتے ہوئے کہا کہ طلبا کے لئے بائیک کی تعداد مزید بڑھائی جائے اور بائیک کی ماہانہ قسط کم از کم رکھی جائے۔طلبہ کا مالی بوجھ بٹانا حکومت کی زمہ داری ہے۔ انہوں نے کہا کہ عوام کے لئے بس کا کرایہ بھی کم سے کم مقرر کا جائے۔ اجلاس کو 20 ہزار الیکٹرک اور پٹرول بائیکس پراجیکٹ اور پانچ شہروں میں 657 بس سروس پراجیکٹ پر بریفنگ دی گئی ۔اجلاس کو بریفنگ میں بتایا گیا کہ طلبہ کو 19 ہزار پٹرول اور ایک ہزار الیکٹرک بائیکس بلاسود ماہانہ اقساط پر دی جائیگی۔ پنجاب بھر میں ٹریفک لائیسنس کے حامل سٹوڈنٹس کو بائیکس دی جائیں گی، بنک آف پنچاب کے اشتراک سے طلبہ کو آسان اقساط پر بائیک دی جائیں گی ۔ سود حکومت پنجاب ادا کرے گی،پٹرول بائیک کی ماہانہ قسط پانچ ہزار اور ای بائیک کی قسط دس ہزار سے کم ہوگی۔مئی میں قرعہ اندازی کے بعد اسی ماہ بائیکس کی ڈیلیوری شروع کر دی جائے گی۔ بریفننگ کے دوران مزید بتایا گیا کہ شہروں میں میل اور فی میل سٹوڈنٹس کیلئے 50٫50 فیصد کوٹہ مختص ہے جبکہ دیہات میں 70 فیصد طلباء اور 30 فیصد کوٹہ طالبات کیلئے مختص ہے۔ لاہور کیلئے 300، راولپنڈی 78, ملتان 100 فیصل آباد 110 بہاولپور 42 ہائبرڈ ڈیزل بسیں لائی جائیں گی۔ 27 مکمل الیکٹرک بسیں لاہور میں چلائی جائیں گی۔ وزیر اعلیٰ پنجاب کی بسوں کا کرایہ کم سے کم رکھنے کی ہدایت کی اور کہا کہ طلباء کے لیے بائیکس کی سکیم کا عید سے پہلے درخواستیں کی وصولی کا اعلان کیا جائے۔ سینئر صوبائی وزیر مریم اورنگزیب، وزیر اطلاعات عظمیٰ بخاری، وزیر ٹرانسپورٹ بلال اکبر، ایم پی اے ثانیہ عاشق، چیف سیکرٹری، چیئرمین پی اینڈ ڈی، سیکرٹری ٹرانسپورٹ، فنانس،ہائرایجوکیشن ڈیپارٹمنٹ، چیئرمین پی آئی ٹی بی، بینک آف پنجاب سے نوفل داؤد اور دیگر متعلقہ حکام نے اجلاس میں شرکت کی۔
