لاہور، 13 مارچ(اے پی پی): وزیراعلیٰ پنجاب مریم نوازشریف کی موجود گی میں پنجاب سیف سٹی اتھارٹی اور این آر ٹی سی کے درمیان معاہدہ طے پا گیا ہے۔ معاہدے کے تحت پنجاب کے 18 شہروں میں این آر ٹی سی کی معاونت سےسمارٹ سیف سٹی پراجیکٹ لگائے جائیں گے۔
سمارٹ سیف سٹی اتھارٹی کی طرف سے ایم ڈی احسن یونس اور این آر ٹی سی کے نمائندے سید عامر جاوید نے معاہدے پر دستخط کیے۔ وزیراعلیٰ پنجاب کو بریفننگ میں بتایا گیا کہ 18 شہروں میں ائیر کوالٹی انڈکس مانیٹرنگ انوائرمنٹ سینسر بھی لگائے جائیں گے۔ وزیراعلیٰ پنجاب کو بتایا گیا کہ گجرات، جہلم، شیخوپورہ، اوکاڑہ،اور ٹیکسلا میں سیف سٹی پراجیکٹ مئی کے آخر تک فنکشنل ہوں گے جبکہ ملتان،بہاولپور،سرگودھا رحیم یارخان،مظفرگڑھ،ساہیوال،جھنگ ،ا ٹک، حسن ابدال ،ڈی جی خان۔ سیالکوٹ، مری، اوکاڑہ، میانوالی سیف سٹی پراجیکٹس اسی سال مکمل ہوں گے۔سینئر صوبائی وزیر مریم اورنگزیب، چیف سیکرٹری، چیئرمین پی اینڈ ڈی، سیکرٹری داخلہ، آئی جی پولیس،سیکرٹری فنانس اور دیگر حکام بھی موجود تھے۔
