لاہور، 15 مارچ(اے پی پی): وزیراعلیٰ پنجاب مریم نواز نے صوبہ بھر کی بڑی رابطہ سڑکوں کی تعمیر ومرمت کے لئے 6 ماہ کی ڈیڈ لائن مقرر کر دی۔ وزیراعلیٰ پنجاب مریم نواز کی زیر صدارت خصوصی اجلاس ہوا جس میں سڑکوں کی تعمیر و بحالی کے پراجیکٹ کا جائزہ لیا گیا۔ دوران اجلاس بریفنگ میں وزیراعلیٰ کو بتایا کہ پنجاب بھر میں 811 سڑکوں کی تعمیر و مرمت اور بحالی کی جائے گی، پنجاب میں پہلی مرتبہ بیک وقت 16ہزار 558 کلو میٹر شاہراہوں کی تعمیر و مرمت ہوگی۔ وزیر اعلیٰ مریم نواز نے پبلک پرائیویٹ پارنٹر شپ سے پانچ ایکسپریس ویز کی تعمیر کا پراجیکٹ جلد شروع کرنے کی ہدایت کردی۔ علاوہ ازیں پنجاب میں انتہائی خطرناک اور بوسیدہ حالت 10پلوں کی تعمیر شروع کردی گئی۔ سینئر صوبائی وزیر مریم اورنگزیب، صوبائی مشیر پرویز رشید، صوبائی وزیر تعمیرات و مواصلات صہیب احمد بھرت،ارکان صوبائی اسمبلی ثانیہ عاشق،چیف سیکرٹری، سیکرٹری فنانس، سیکرٹری تعمیرات ومواصلات اور دیگر متعلقہ حکام نے اجلاس میں شرکت کی۔
