اسلام آباد،16 اپریل(اے پی پی):وفاقی وزیر برائے صنعت و پیداوار اور نیشنل فوڈ سیکیورٹی رانا تنویر نے کہا ہے کہ حکومت کسانوں کی فلاح وبہبود اور زراعت کی بہتری کیلئے پر عزم ہے اور کسانوں کو بلا تعطل کھاد کی فراہمی کو یقینی بنا رہی ہے۔
ان خیالات کا اظہار انہوں نے فرٹیلائزر ریویو کمیٹی کے جائزہ اجلاس کی صدارت کرتے ہوئے کیا۔وفاقی وزیر نے کہا کہ وزارت صنعت و پیداوار، صوبائی حکومتوں کے ساتھ ملکر کھاد کی دستیابی اور پروڈکشن کو مانیٹر کر رہی ہے۔انہوں نے کہا کہ حکومت زرعی ترقی اور کسانوں کی خوشحالی کیلئے مربوط اقدامات کو یقینی بنارہی ہے، کھادوں کو بروقت فراہمی سے کسان پیداوار میں بھی اضافہ ہو گا۔
رانا تنویر نے کہا کہ کسان خوشحال ہوگا تو ملک خوشحال ہو گا،زراعت اور صنعت کی ترقی کیلئے تمام تر وسائل بروے کار لائیں گے اور فرٹیلائزرز پلانٹس کیلئے گیس کی فراہمی یقینی بنائی جائے گی۔انہوں نے کہا کہ مینوفیکچرنگ انڈسٹریز ترجیحی بنیادوں پر کھاد کی پیداوار کو بڑھائیں،ملک کو معاشی طور پر مضبوط بنانے کیلیے تمام سٹیک ہولڈرز کو ملکر کام کرنا ہو گا۔انہوں نے مزید کہا کہ صنعت اور زراعت کی ترقی سے ملک کی ترقی وابستہ ہے،ہمیں اپنے کسانوں کے لیے یوریا اور ڈی اے پی کھاد کی دستیابی کو یقینی بنانا ہوگا۔
اجلاس میں خریف سیزن کے لیے یوریا اور ڈی اے پی کھاد کی طلب اور رسد کا جائزہ لیا گیا اور بریفنگ میں بتایا گیا کہ خریف سیزن 2024 کے لیے یوریا کھاد کی مانگ گزشتہ سال کے مقابلے میں 3.6 فیصد زیادہ ہے۔
اجلاس میں وفاقی سیکرٹری فوڈ سیکیورٹی کیپٹن ریٹایرڈ محمد آصف اور وفاقی سیکرٹری انڈسٹری سمیت صوبائی نمائندگان اور مینوفیکچرنگ انڈسٹری کے نمائندے بھی شریک تھے۔
